出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
法治 不是戴耀廷所講的「違法達義」!
法治 不是戴耀廷所講的「違法達義」!

過去呢幾年,囍雨越來越唔明,呢個世界,有冇教人犯法嘅「學術自由」呢?

 

港大校務委員會噚日開會,大比數通過即時解僱有罪在身嘅法律學院副教授戴耀廷教席。冇耐,戴耀廷喺佢社交平台發文回應事件,第一句話,就話呢個決定「是由大學以外的勢力透過它的代理人作出」;第二句話,就開始控訴自己被炒,係香港「學術自由的終結」。囍雨失笑,佢犯罪令到自己無咗個飯碗,關學術自由事嘅咩?

 

戴耀廷,你唔係「研究」違法達義喎!

 

講到戴耀廷嘅「學術偉論」,點都唔少得「違法達義」;藉住呢四個字,戴耀廷喺過去幾年間,喺香港掀起幾多「腥風血雨」?將幾多純白如紙嘅青年、學生推上暴力違法之路!戴耀廷請你搞清楚,依家你唔係「研究違法達義」喎,你係用「實際行動」宣揚、推行緊「違法達義」!咁都叫「學術自由」?唔好玩啦!

 

至於所謂「外部干預」嘅問題,囍雨喺度又要請大家搞清一個概念,今次決定「炒魷」戴耀廷嘅,係港大校務委員會;姑勿論誰是校監誰是主席,呢個委員會本身就係港大一部分!囍雨就話,今次港大決定解僱戴耀廷,其實合情合理,事實上,亦都俾戴耀廷歷時一年嘅足夠時間去抗辯。當然,戴耀廷有權上訴、提出司法覆核,囍雨冇意見,因為呢啲正正係香港法治社會嘅一部分,但請戴耀廷記住:法治,就唔係你所講嘅「違法達義」,唔係做咗違法嘢唔認數,又或者鼓勵其他人任意違法、打砸搶燒!呢啲嘢,你做過,就冇得唔找數!

 

睇清戴耀廷做過嘅「好事」!

 

其實,戴耀廷做過乜,自己心知肚明啦!囍雨要提出質問:2013年1月,首次喺報章撰文提出「公民抗命」、企圖以大規模違法行動威脅政府以至中央讓步嘅,係咪你戴耀廷?2014年9月28日,喺政府總部東翼前地高聲宣佈「佔領中環正式開始」,喺「佔中」期間不斷鼓吹「違法達義」歪理嘅,係咪你戴耀廷?2018年3月,去台灣出席「五獨」論壇,宣揚「要思考香港建國可能性」嘅,係咪你戴耀廷?今年4月,部署「真攬炒十步」,意圖癱瘓特區政府、「攬着中共一起跳出懸崖」嘅,係咪又係你戴耀廷?

 

呢啲「罪狀」,條條都明明確確、證據確鑿;有冇觸犯刑事法例,囍雨唔敢講,但戴耀廷所作所為,「最低限度」係咪有違道德、枉為人師呢?相信市民大眾自有公論。

 

戴耀廷話,有信心喺未來見到「港大重生」,其實,囍雨同好多香港人關心嘅,係包括港大在內,香港嘅教育以至社會可唔可以「重生」,但願,革除戴耀廷呢種失德教師,可以成為香港教育界重生嘅開端!

 

原圖:文匯報


請Follow我們的YouTube頻道:

https://bit.ly/2kgU8qg

 

下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

4
嬲爆
18
支持
2
無意見

評論