如果問呢個世界有咩「筍工」，廣男認為，當攬炒派議員絕對稱得上數一數二：唔使論政議政，唔使關顧民生，只要去到議會內搞拉布、搞攬炒，依然可以十萬元月薪袋袋平安，臨尾仲有70萬元約滿酬金。當然，想坐呢個位，係有「門檻」嘅，感覺上就好似江湖片中嘅人物咁，想上位，夠激夠勇自然唔少得，如果再被捕被起訴甚至被罰過，就更加係揚名立萬嘅光環。講到呢樣嘢，現任立法會議員許智峯就係典型嘅人辦之一。
適時蒲頭表演
話說噚日，一班示威者又趁住7.21去元朗搞「紀念」活動，「新穎之處」在於，今次「黃背心記者」多過群眾，甚至一度多過警察。當警察截查可疑「記者」過程中，身處現場嘅許智峯，呢個時候搵到發揮位，大聲指摘警方「非法禁錮記者」，藉此煽動人群情緒；至夜晚9點幾，大部分「記者」都散水，許智峯仲喺商場一帶遊走，搵機會煽動市民情緒。之後當警員將其截停要求搜身時，許智峯更加「戲子」上身，唔單只多番唔合作，仲要扮嗮嘢「插水倒地」耍賴皮，最後被警員戴上手銬帶走，並被控涉嫌阻差辦公。
由上述過程，大家睇到啲乜？廣男就話，許智峯嘅「精明」之處，就在於佢想要嘅，就係果幕為「記者」發聲、被警察帶走嘅畫面；涉嫌「阻差辦公」，就喺支持者面前保住自己嘅「抗爭形象」，成本低、回報高，你話係咪抽水抽到盡！
當然，執筆一刻，廣男尚未聽聞許智峯正式報名參選九月立法會選舉，不過就喺度諗，許智峯身為一個港島中西區嘅區議員、立法會議員，如果唔係為咗繼續上位或者保住議席，點解又要山長水遠走去元朗現身「抗爭」現場呢？呢啲政客，如果唔「適時」蒲頭表演下，又點對得住咁多喺「初選」入面投票俾自己嘅「民意」？！之但係，如果咁嘅政客都要晉身議會嘅時候，大家其實又要換個角度睇問題，應該好好諗下，呢種「立法會議員」，長期霸住個位，攞緊公帑出糧，又為市民大眾做過啲乜實事？
不能再輕放許智峯
對於呢個問題，廣男真係數唔出，不過相反，講到許智峯嘅「違法史」或涉嫌「違法史」，就簡直「成匹布咁長」，例如2018年5月5日，許智峯因為喺立法會搶一位女行政主任嘅手機而被捕被告，且之後三項罪名成立；2019年9月15日，涉嫌喺北角阻差辦公被捕；今年6月12日，涉嫌喺銅鑼灣非法集結被捕…廣男好奇，乜依家啲攬炒派政客，唔專心參政議政，淨係一心靠「抗爭」、被捕嚟「保名氣」嘅咩？如果係咁，大家又要諗下，對於呢啲屢勸不改嘅政客，如果不斷「以身試法」，係咪應該罪加一等、檢控更加嚴厲嘅控罪呢？
許智峯擬參選立法會香港島選舉，已報名參選香港島的人士有工聯會郭偉强、民建聯張國鈞、香港初心鄧偉俊、熱血公民莊芷茵、梁晃維和袁嘉蔚。
原圖：中通社
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論