「港區國安法」實施，攬炒派即刻作「鳥獸散」，走嘅走，唔走嘅「縮」晒；堅決留港嘅前香港眾志秘書長黃之鋒近日又有新聞，話說有大公報記者就住一啲問題發訊息問黃之鋒，點知黃之鋒竟然將載有對方工作機構、姓名同電話嘅對話截圖擺上網，仲叫其他人諗到「答案」可以直接回答該名記者。咁高調玩起底、欺凌，如果唔需要受到法律追究嘅話，仲有法治可言？
涉犯多罪 必須追究
根據傳媒引述法律界人士意見，指黃之鋒嘅行為，可能已經觸犯咗多條香港法例，包括《簡易程序治罪條例》第20條、《刑事訴訟程序條例》第89條以至《私隱條例》等等；黃之鋒實際有冇觸犯咩罪，有待法執法機構調查，廣男就覺得，執法部門唔好因為佢係「知名政客」就唔執法。一個公眾人物涉嫌違法，更加要依法追究，話俾大眾聽就算係攬炒派政客犯法，一樣要拉！
除咗黃之鋒嘅行為涉嫌違法，廣男仲想指出，黃之鋒咁樣公開人個人資料、挑起騷擾事件係極度無品！咁耐以嚟，廣男仲未見過有政客俾記者問問題，然後主動公開記者個人資料，仲叫其他人「回應」個記者；作為一個公眾人物，有記者問佢問題唔係好正常咩？如果唔想被問問題，不如學前政務司司長陳方安生咁「歸隱」囉！
記協為何默不作聲？
廣男就喺度諗，如果事件嘅主角「調轉」，係黃之鋒咁樣俾人公開個人資料，相信公開佢個人資料嘅人已經受到鋪天蓋地嘅攻擊，黃之鋒依家公開人個人資料仲「洋洋得意」，廣男真係好期待，如果有一日佢因為呢件事被捕，係咪仲可以咁招積呢？
話說回來，經常要捍衛新聞自由嘅記協，點解好似唔見佢哋出聲，批評或者譴責黃之鋒嘅？依家有人公開記者個人資料、引人欺凌記者喎，記協又想扮睇唔到？對於黃之鋒公開記者個人資料一事，廣男喺度懇請記協快啲為受害記者發聲；至於執法部門，當然要介入調查，有需要就拘捕黃之鋒啦。唔駛急，最緊要快！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論