出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
做政客最緊要「走得快」!
做政客最緊要「走得快」!

做政客最緊要係咩?好似楊岳橋咁最識得諗soundbite例如講「over my dead body」?定係好似許智峯咁,最緊要識得「衝」?定還是好似梁繼昌咁,要識得喺適當時候「隱形」?答案統統都錯,做政客,尤其係攬炒派政客,最緊要識得「閃」同「縮」,走得快,好世界!呢兩日囍雨睇新聞,先見到有「國師」之稱、「城邦論」作者陳雲宣布退隱,繼而見到「學生獨立聯盟」召集人陳家駒證實咗自己已經「離開」香港。即係話,唔計一啲已經「縮」咗嘅元老級政客,攬炒派嘅「獨派」代表都開始「走佬」,如果話佢哋唔係因為「港區國安法」而「縮」,大家都唔會相信囉!

 

「貨真價實的港獨」

 

講開陳雲,外界對佢印象最深刻嘅,可能係佢嘅「著作」《香港城邦論》,入面講到明香港可以「建國」;而囍雨最記得嘅呢,就係佢2016年參與立法會選舉落敗之後,俾人問佢嘅政治主張時,佢講到明所謂「永續基本法」,係「貨真價實嘅港獨」,一個多年來煽動「港獨」嘅人,會突然因為香港人「不需要佢嘅社運指導」而退出?囍雨就好有保留喇。

 

至於陳家駒,囍雨唔係想恥笑佢,但佢嘅一言一行,比起陳雲更為肉酸,一個年輕政客要煽動「港獨」,唔出奇,奇就奇在一個成日話要「香港獨立,以死相搏」嘅政客,唔好話「以死相搏」,「港區國安法」都未正式立法都「走佬」,「衰仔」咗啲喎!根據傳媒報道,陳家駒直認「國安法是主要離開的導火線」,所以囍雨話「港區國安法」有震懾力,絕對係鐵一般事實!

 

被煽動青年慘了

 

喺政客「縮骨」、「走佬」事件上面,囍雨覺得最慘最慘嘅,就係一班呢一年嚟聽政客煽動,繼而走上街頭違法抗爭嘅年輕人,由上年直至「港區國安法」有立法消息,攬炒派政客、媒體不斷聲稱要抗爭,有啲就讚年輕人有勇氣,有啲有話抗爭「無停下來嘅理由」,好啦,啲後生仔聽咗政客講「唔好停」啦,結果原來係自己被捕,而呢啲政客唔係「走佬」就宣布「退穩」,囍雨要代呢啲年輕人問「走佬」政客一句,你哋對唔對得住啲「手足」呀?

 

過去一年,有近9,000人因為黑暴運動被捕,當中約四成為學生,囍雨覺得事情應該到此為止,再違法「抗爭」落嚟,除咗政客會得到政治利益,其他年輕人只會「輸得更慘」,甚至賠掉前程;無論係「以死相搏」抑或係「over my dead body」,都只係政客用嚟吸引注意嘅政治口號,香港嘅年輕人,醒一醒啦,你啲「大哥、大姐」都「走佬」同退場,真係唔好再俾人利用做傻仔喇! 

 

圖片來源:陳家駒社交網站圖片


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

6
嬲爆
2
超無奈
1
無意見

評論