聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
過半台灣人反對港人到台
過半台灣人反對港人到台

今日廣男睇新聞,見到《生果報》有一條好「吸睛」嘅新聞標題,寫住《42%台人歡迎港人居留》,驟眼睇,好似好多台灣人支持給予香港人喺台灣有居留權甚至公民權。但咪住先,《生果報》啲嘢,大家從來都要「睇真啲」,廣男睇內文,原來真相係雖然有41.5%受訪台灣人贊成香港人到台灣,但反對嘅更多,有成50.5%;換句話說,有四成人台灣人支持香港人到台係真嘅,但過半數人反對港人到台先係重點,《生果報》呢條標題,真係「Fake到爆」!


台灣人主流民意不歡迎港人


根據《生果報》嘅報道,呢個由台灣民意基金會搞嘅調查,過半人唔贊成「台灣應保護和歡迎大量香港人來台」,當中較年輕同教育程度高嘅受訪者,較贊成仿效英國做法(給予BNO持有人申請英國公民權機會),而較年長例如40歲以上嘅人,就傾向唔接受台灣吸收大量港人移民。明明係反對者佔多,但《生果報》就演繹為42%人贊成,數字呢樣嘢,果然係「任人演繹」。


對於呢個調查,廣男認為有幾點非常值得大家留意,首先,當然係外界營造到台灣好似好支持香港咁,但其實大多數台灣人,根本就唔係咁歡迎香港人,香港人係咪要去一個人家唔太歡迎自己嘅地方?其次,就如之前台灣公布嘅所謂「救援方案」,其實台灣政府實質上無乜新而又有力嘅「支援措施」,「救援」港人都係case by case咁做,會唔會香港人去到其實無乜支援幫到自己?最後,當然就係台灣經濟都唔係好好,好多大學生搵幾千蚊港紙一個月,香港人嘆慣用慣,係咪甘心去「捱世界」呢?


要走就走吧


話雖如此,廣男唔會反對有人選擇移民台灣,因為呢啲係個人自由、選擇。廣男反而喺度諗,如果有班激進反政府人士甚至暴徒,佢哋選擇「移居」台灣,會唔會令到香港可以快啲回歸安寧呢?至於台灣,接收咗一班「衝衝子」以至「火魔法師」,台灣再有動盪,喺台灣嘅香港抗爭者,咁又有機會「表演」,喺台灣爭取「五大訴求」囉!大家話幾好! 


圖片來源:新華網


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

18
驚訝
4
唔係呀哇
6
無意見

評論