對於「港區國安法」立法，攬炒派將法例視如洪水猛獸，有啲個勢似想「走佬」，有啲話會「收聲」，有啲就要求「港區國安法」無追溯、唔好由內地執法云云。囍雨噚日睇新聞，見到國務院港澳辦副主任鄧中華出席研討會時，講到明中央都應保留喺其特殊情況下對嚴重案件實行管轄權力，囍雨就喺度諗，「港區國安法」關乎國家安全同穩定，如果要立法後中央「完全無角色」，似乎有啲於理不通。
國家不能坐視不理
對於鄧中華嘅講話，囍雨認為有三點值得大家留意，第一就係維護國家安全香港有責，但中央都應當保留權力，尤其係喺香港特區發生嚴重危害國家安全嘅犯罪案件時；第二就係中央同特區政府都需要設置相應嘅機構維護國安；第三則係中央同特區政府維護國安嘅機構要擁有必要嘅權力。簡單而言，就係中央喺執法唔會無角色，亦不可能無權力。
囍雨認為，鄧中華一番說話講得相當有道理，好簡單一個例子，如果一個國家嘅國安法由地區自己執行，一旦果個地區有人話要獨立，地方政府點處理？有啲可能關係到中央而地區未必處理到嘅嚴重問題，由中央政府去處理根本就係合情合理，所以如果「港區國安法」立法，香港嘅執法部門可以係調查、執法嘅主軸，但中央依理唔會立完法就「乜都唔管」。
國安執法既要資源 也要權力
承上文所言，既然中央會保留一定權力，咁中央當然亦應該設置相應嘅機構維護國家安全；至於執法問題或者權力問題，囍雨就認為不論係中央設立還是港府自己設立嘅機構，都應該有足夠權力、資源，因為香港問題複雜，又有外國勢力喺香港活動，如果執法部門無足夠資源去用人調查、拘捕同檢控，又或者俾一啲規範「綁手綁腳」，根本就好難喺香港維護好國家安全。
其實，從近日攬炒派政客嘅一言一行可見，「港區國安法」確實係阻嚇力，接住落嚟大家除咗等全國人大常委會立法外，就要睇下法例落實後執法人員點樣「打老虎」，不過大家唔駛擔心，因為法例所針對嘅，明顯只係分裂國家、顛覆政權、勾結外力或者搞本土恐怖主義嘅人，我哋呢啲平民百姓，根本唔會受到影響。
圖片來源：新華網
請Follow我們的YouTube頻道：
下載我們的手機應用程式，收看第一手精彩內容：
評論