聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
請葉建源「不要閃、表個態」
請葉建源「不要閃、表個態」

攬炒派為反「港區國安法」,打算發起新一輪嘅罷工、罷課行動,教育局為免政治再度入侵校園,局長楊潤雄日前向全港中小學校長發信,提醒學校要正確引導學生認識「港區國安法」,免受誤導,唔應該容許學生參加所謂「公投」或罷課,校方應要勸止學生唔好參加「騎劫」學校政治表態嘅活動。對於教育局極度正常嘅指引或者勸導,立法會教育界議員葉建源竟然形容教育局「措辭強硬、向學生及教師施壓」,令校園狀況更緊張云云。簡簡單單,廣男想問葉建源一句,對於政治入侵校園,葉建源唔好再閃避,你係支持定反對先?


又是沒有立場?


對於葉建源又借機攻訐教育局,廣男想指出一點,廣男睇唔同嘅新聞報道,睇嚟睇去,就係睇唔到葉建源個人有清晰嘅立場。對於政治入侵校園,甚至係黑暴入侵校園,葉建源到底係支持定反對?唔好再話「不支持」呢啲縮骨嘅答案。如果你問廣男,廣男就會覺得教育局咁做,係因為通常啲學生罷課,繼而有唔少就會出去街頭抗爭,最後落得被捕、被撿控嘅「下場」,呢個因果關係,廣男唔信葉建源「睇唔到」!


睇返成個黑暴運動,持續咗足足一年,呢一年近9,000人被捕,當中超過3,600人係學生,被捕學生入面有四成係中學生,呢個數字代表啲咩?代表咗黑暴唔單止入侵校園,而且學生已經成為黑暴運動嘅一大主力,如果繼續俾政客煽動學生參與政治行動,用執法角度睇,抗爭學生就係「自動送頭」;用家長角度睇,子女就成為咗政治犧牲品,葉建源作為教育界代表,唔出聲遏止歪風,仲喺度抹黑教育局,完全唔能夠接受。


有縱暴教師 自有勇武學生


如果無一直縱暴嘅政客,如果無一直縱暴嘅教師,學生根本就唔會成為政治鬥爭嘅工具,喺呢度,大家要問清楚葉建源,佢作為「從政者」,到底佢想要一個點樣嘅校園?自由開放,包括可以鼓吹黑暴?定係嚴防政治入侵校園,以免學子被荼毒?作為攬炒派一分子,可能葉建源無乜選擇空間,但佢要知道,如果佢作為教育界代表都對黑暴「隻眼開,隻眼閉」,咁佢就係失德、失職,有負教育專業! 


圖片來源:RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk


16
嬲爆
0
超無奈
1
無意見

評論