「港區國安法」將至，有人話係一面「照妖鏡」，照出攬炒派政客嘅百樣醜態、前言不對後語。可能係有見於外部勢力呢幾日似乎對香港「有動作」，例如一時有英國話考慮延長BNO免簽逗留期限，一時有美國話考慮接收港人、取消香港特殊待遇等等，之前啱啱先講完「港獨不可行」嘅攬炒派元老李柱銘，今日又有啲新論述，直頭口述歷史、講到「香港事務絕不是中國內政」。廣男想講，其實講到尾，又係諗住「曲線反立法」？定係想英美「共管」香港？睇嚟李柱銘真係好指意英美主子打救喎！
李柱銘呢篇喺生果報嘅「講古仔」文章，簡單嚟講，就係為英美插手香港事務搵「理據」，話中共喺當年《中英聯合聲明》公佈時，「故意不把香港事務視為中國內政，藉以對外展示一國兩制的成功」，又講到中央之所以提出「五十年不變」、港人治港、高度自治等，係因為要拒絕英國當年提出「續約」香港，而作出嘅一系列承諾…總之講到今日係中國「單方面改變、違反承諾」，甚至提出，事關香港嘅問題應該「交由聯合國/國際法院來審理、裁決」云云。嘩！廣男想講，睇嚟李柱銘真係好唔想承認中央對香港有全面管治權喎。
中央事權 清清楚楚
關於呢啲咁茲事體大嘅問題，廣男認為大家真係有必要睇真啲好，最簡單直接，就係睇番《中英聯合聲明》條文，嗱，其中白紙黑字講明，香港「直轄於中華人民共和國中央人民政府。除外交和國防事務屬中央人民政府管理外，香港特別行政區享有高度的自治權」；關於涉港基本方針政策，亦都講明「中華人民共和國全國人民代表大會將以中華人民共和國香港特別行政區基本法規定之，並在五十年內不變。」
大家睇到啲咩？廣男就睇到至少兩點，第一，中國政府將中央事權講得好清楚；第二，中央透過《基本法》，落實《聲明》內容。同埋大家唔好忘記，《基本法》第18條，亦都一早講明將全國性法律透過納入附件三、喺香港實施嘅問題，點解李柱銘依家又要講啲唔講啲？予人感覺，似乎佢又想將香港演繹為「完全自治」咁款。
李柱銘變來變去
廣男認為，李柱銘依家講咁多，其中一個目的就係想誤導一啲對《基本法》、「一國兩制」以至《中英聯合聲明》一知半解或者根本唔了解嘅人，令佢哋誤認為中央真係違反承諾，繼而加入「反立法」之列。尤其當李柱銘講到「如果香港50年不變，英、美對港的立場當然也不會變」時，廣男真係要問句，依家港人治港、高度自治究竟有咩實質改變先？如果李柱銘以至攬炒派講到中央訂立「港區國安法」，就係「一國一制」、不變嘅嘢全部「變咗」，咁廣男又要反問下，如果冇「港獨」、冇黑暴搞分裂破壞，當然可以五十年不變；但如果有人將香港變成反華基地，中央又點樣「不變」應萬變呢？依家係邊個逼到中央出手立法先？！李柱銘一時話「港獨」不可行，一時又將香港講到好似「無王管」咁款，唔係好矛盾咩？
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論