聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
戴耀廷終於知驚,講定會收聲?
戴耀廷終於知驚,講定會收聲?

依家香港政局變化快,但變得更加快嘅,係政客嘅嘴臉。對於中央出手訂立「港區國安法」,之前仲宣揚緊「攬炒十步曲」嘅攬炒派「冷氣軍師」戴耀廷,近日接受報章專訪時,態度明顯有「轉變」,廣男睇佢其中一個意思,就係中央立法已經令「攬炒」提前嚟到;香港有冇得「死裡逃生」、有冇「轉機」,要睇國際社會出咩招…廣男唔明喇,如果「港區國安法」真係攬炒香港,咁戴耀廷呢班攬炒派都算求仁得仁,點解依家又要講到要生要死咁款呢?

 

會收聲、唔踩界?

 

呢樣都未算經典,廣男見到戴耀廷最大嘅「思想轉變」,係當講到會唔會擔心自己日後喺「港區國安法」之下可能被捕時,就好坦白地話「如果國安條例有追溯力,咁我冇得走啦;但如果冇追溯力,我咪收聲囉,唔講一啲會踩界嘅嘢」。廣男想講,咦!終於識驚喇、知道要收聲喇咩?!戴耀廷都真係幾醒喎,平時就成日宣揚攬炒,叫人「流血抗爭」,推其他人啲後生仔女去「衝」,自己就永遠喺幕後扮軍師「指點江山」咁款,依家眼見「港區國安法」勢在必行,自己又第一個縮?!

 

戴耀廷害了幾多人!

 

但咪住先!戴耀廷唔好以為依家公開表達下「以後收聲、唔再踩界」,以前嘅所作所為就可以當粉筆字抹咗去喎!廣男認為好多市民,尤其係青年、學生們嘅家人、師長都應該聲討戴耀廷,大家回想下,由幾年前「違法佔領」開始,戴耀廷等人就不斷透過宣揚「違法達義」歪理,推咗幾多年輕人去犯法,又有幾多人俾佢害到要坐監甚至賠上一生前程!好喇,依家國安法就嚟,戴耀廷自己就驚到預早講定要收聲,呢啲正宗「叫人衝、自己縮」嘅典範,大家認為係咪可以就咁輕輕放過佢呢?

 

還在幫攬炒派謀政治利益!

 

其實,戴耀廷今次喺專訪入面,仲有啲「其他意思」,譬如「35+」(立法會議席過半)應該有所改變,「由迫使政府出辣招,改為凝聚公民力量」…根據戴耀廷嘅講法,「35+」目的係為咗攬炒,依家攬炒已達成,理論上應該唔洗再搞落去,於是口風一轉,又話是什麼凝聚公民社會,但講講下,又扯到去「若民主派最終得票率可達七成,亦能向國際社會展現港人決心與堅持」等等,原來講咁多,到最尾又係想幫攬炒派政客上位、拎政治利益?!

 

同埋,依家香港被班攬炒派搞到咁,戴耀廷仲想點「死裡逃生」、有咩「轉機」?逼到中央忍無可忍要出手嘅,又係邊個?講真,「港區國安法」日後執行,守法市民根本唔洗驚,但分裂、顛覆國家嘅政客,恕廣男直言,就實在難講啦!尤其大家睇下依家戴耀廷嘅反應,就知道立法真係有必要!


請Follow我們的YouTube頻道:

https://bit.ly/2kgU8qg

 

下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk


62
好好笑
19
好喎
8
搞笑咩

評論