政客為警察送上「黑暴人頭」?
政客為警察送上「黑暴人頭」?

立法會今日恢復二讀辯論《國歌法》,如果大家由噚日開始有留意網上平台嘅消息、動向,相信或多或少都feel到啲「緊張氣氛」,因為已經不斷有人號召上街「抗爭」,揚言要通宵包圍立法會、「全民勇武」及「沒有退路」等等,有見及此,立法會一帶嘅保安由噚日下晝開始就明顯加強,據報至少3,500警力喺現場戒備。廣男噚日仲同朋友講笑,依家中央講明要立「港區國安法」,警方亦都表明會嚴正執法,應該唔會仲有「傻仔」蠢到仲要去「送頭」(犯法自投羅網)吧?但原來,真係有!


又有一批青年、學生被捕


廣男今朝都一路留意住新聞,起初聽到嘅,係多區都有人違法,例如喺將軍澳、紅磡都有人用雜物、鐵欄、鐵釘堵路,甚至喺港鐵葵興站,有人向列車路軌投擲圍欄導致來回線都受阻…但聽下聽下,就開始不斷有違法分子被警方拘捕嘅新聞報道,例如喺荃灣,兩名分別14及15歲穿著校服嘅學生因為遊蕩、形跡可疑,被警方截查,結果搜出頭盔同防毒面具,當場「斷正」;喺深水埗,警方截查兩名分別15歲及18歲少年時,又喺佢哋身上搜獲多個汽油彈…根據警方消息,今朝嘅執法行動,已經喺多區合共拘捕至少16人,涉及藏有攻擊性武器等罪行。廣男發覺,呢班人中其實唔少都係學生、青年,包括一名科大4年級學生,而年齡最細嘅,只得14歲(執筆之時,警方又喺中環、灣仔、銅鑼灣、旺角等多區採取行動,拘捕約300人,大部分都涉嫌參與未經批准的集結)。


笨人出手 自投法網


講真,睇到上述報道,廣男第一刻諗到嘅,就係果句「精人出口、笨人出手」。過去一年,其實好多市民都已經慢慢睇清楚,邊啲人淨係躲喺幕後「出口」,邊啲上街「出手」做暴民,廣男就話,仲有一類更加愚蠢嘅人,係「出自己」(聽信煽惑去犯法)。就好似今日被捕嘅呢班青年、學生咁,見到有人(政客、幕後大台)叫「衝」,佢哋就真係出嚟衝,結果?咪就係將自己送入警方佈下嘅法網囉!


又好似剛過去嘅星期日咁,其實喺銅鑼灣一帶嘅情況亦都差唔多,有政客煽動上街、抗爭,結果真係有批後生仔女「響應號召」去打砸商舖、私了無辜途人…結果又係點?就係將近二百人被拘捕,其中近30個仲係未成年人士。廣男想講,呢班人點解又唔諗下,叫你哋去衝嘅果班政客、大台,自己有冇出嚟衝?又或者有冇叫埋佢哋嘅朋友、親戚、家人一齊衝?


政客要「威」,識得先幫自己「戴頭盔」;啲後生仔女又以為自己「參與抗爭」好威?錯嗮啦!係啲政客推你哋去「送死」咋!依家咁多學生、青年被捕,以為仲有外國勢力幫手「拯救」?咪傻啦,如果你係黎智英、李柱銘呢啲「有頭有面」嘅政客,外國梗係會幫,但至於其他無名小卒?對唔住,自求多福啦!廣男喺度真係要再奉勸一句,咁多後生仔女被捕,最大嘅可能性,就係班攬炒派政客最多喺立法會「叫兩句、衝兩下」,之後就食住人血饅頭上位;而班被捕者,就可能面臨檢控、起訴甚至坐監,有啲仲可能從此賠上一生前程…係咪值得?自己諗清楚吧!


原圖:rthk


請Follow我們的YouTube頻道:

https://bit.ly/2kgU8qg

 

下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

8
令人傷心
5
點算呀
14
嬲爆

評論