出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
港台至少還有四大問題!
港台至少還有四大問題!

港台節目《頭條新聞》因為污衊、矮化警隊,被通訊局裁定投訴成立,攬炒派政客同媒體紛紛以言論自由為其作擋箭牌,無視港台「誹謗」警隊嘅事實。囍雨想講,港台嘅問題,絕不止於得《頭條新聞》,其他節目包括《脈搏》、《左右紅藍綠》以至《台灣故事III》等,一樣有包括仇警、暗撐「台獨」嘅問題,港台唔好以為處理咗《頭條新聞》,就可以蒙混過關。


其他節目的問題呢?


喺呢度,等囍雨同大家recap下港台節目嘅種種問題,除咗《頭條新聞》之外,其英文節目《脈博》,主持竟然喺訪問世衞高層時,問對方會唔會考慮台灣嘅會籍,但世衞成員國都係以主權國家為單位,台灣唔係國家,點加入世衞呢?港台記者唐若韞咁問,極有意指台灣係「國家」嘅意味;另一港台節《台灣故事III》,直頭以國家嚟形容台灣,當台灣係「國家」咁。港台多於一個節目有支持「台獨」意味,有違一個中國原則,嚴重程度,係咪俾《頭條新聞》更甚呢?


至於仇警嘅節目,港台當然亦「唔止一個」,教大講師喺港台節目《左右紅藍綠》入面,污衊警隊「血腥圍攻」理大、「報復式廝殺平民」、「以市民同埋學生作為活靶」等等,擺明係偏幫暴徒,而將執法嘅警方「妖魔化」,囍雨唔明白,點解通訊局都表示投訴成立,但港台無人需要為事件問責嘅呢?次次都係「警告」,某程度上就等於「無罰過」!


港台管治 最大隱患


以上係《頭條新聞》以外嘅三個節目、三個問題,但呢啲問題透視出嚟嘅第四個問題先係最嚴重,就係港台到底係點管治、監督員工製作節目?老實講,如果有足夠嘅監督同制衡,一定唔會出現咁多仇警、支持「台獨」嘅節目,港台言不由衷地為《頭條新聞》問題致歉,但囍雨想問,港台有咩機制確保佢哋嘅節目唔會再出問題?問題已經出現咗,係咪有人要為事件負責,引咎辭職?


囍雨喺其他文章都講過一個道理,警告、譴責而無實質懲罰,其實係無用嘅。大家要留意一點,港台唔係咩私人電台,而係一個用公帑運作嘅公營廣播機構,要對政府、對市民負責,如果連公營機構都唔需要向特區、國家負責,咁「造反」歪風日盛,令人覺得香港好多公營機構人士「造反」,都唔怪得人! 


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

12
嬲爆
0
超無奈
0
無意見

評論