出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
誣衊「兩辦」 全為「去中央化」
誣衊「兩辦」 全為「去中央化」

盲反派立法會議員郭榮鏗喺主持立法會內會正、副主席選舉時,刻意同其他盲反派議員「拉布」,令內會由去年十月至今,經歷15次會議都未選到正、副主席;有監督特區責任嘅港澳辦、中聯辦(「兩辦」)發聲明批評郭榮鏗等人「拉布」、「政治攬炒」,反被盲反派攻訐為「干預立法會」。囍雨就覺得,盲反派呢種「反中」傾向,說穿了其實就係「去中央化」,喺憲制上製造「權力不及香港論」,根本就係一種分離思想!否則,盲反派又點會處處「歡迎」外國勢力介入香港,而抹黑為港發聲嘅「兩辦」呢?

 

《基本法》第12條:特區直轄於中央人民政府

 

港大法律學院教授陳文敏等盲反派學者或政客不斷利用《基本法》第22條指控「中央人民政府各部門」干預特區運作,囍雨喺度要同大家講清楚,講起《基本法》,大家都應該睇睇《基本法》第12條(陳文敏喺報章寫文講第12條時都係「講啲唔講啲」),當中闡明「香港特別行政區是中華人民共和國的一個享有高度自治權的地方行政區域,直轄於中央人民政府」,即係話特區唔係「無人管、無王管」,而係直轄於中央政府;咁咩中央機構可以監督特區呢?明理人都會諗到,「兩辦」喺當中有重要角色。

 

至於「兩辦」係咪《基本法》所指嘅中央政府部門,囍雨又要講下,其實「港澳辦」係「國務院辦事機構」。至於中聯辦,按國務院2000年1月15日發俾香港特區政府嘅通知,係「中央人民政府駐香港特別行政區的機構」,即係所謂嘅「派出機構」;其實有關文件講得好清楚,中聯辦其中一項職能係「承辦中央人民政府交辦嘅其他事項」,即係要替中央喺香港處理事務,呢份文件喺20年前已經發出,囍雨真係想知道,盲反派政客係咪無睇過,唔知中聯辦喺香港有一定職責呢? 

 

政客干擾立會運作 「兩辦」不得不發聲

 

盲反派政客或者會認為,立法會事務屬於「特區內部事務」,「兩辦」唔應該發聲;囍雨就覺得,如果立法會運作正常,莫講話「兩辦」,其他人都無興趣理會,但依家嘅狀況係,郭榮鏗等盲反派議員「拉布」,已經令到立法會接近「運作唔到」,兩辦作為中央政府嘅「辦事機構」同「派出機構」,責任上就有必要發聲。

 

「一國兩制」,從來都唔係只有「兩制」、沒有「一國」,盲反派政客及部分媒體依家不斷講《基本法》第22條,營造中央喺香港「無角色」嘅假象,講到尾都係玩「去中央化」、搞分離主義!奇怪嘅地方,係根據盲反派嘅「神邏輯」,中央機構「唔應該」出聲,但外國勢力就「歡迎干預」,佢哋係唔清楚香港位置,定係認為外國先係佢哋嘅「主人」?


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


5
嬲爆
0
驚訝
0
點算呀

評論