明明「拉布」 又不承認?
明明「拉布」 又不承認?

盲反派議員、政客,都有一個特質,就係「敢做唔敢認」,明明係縱容黑暴,就話自己支持市民遊行示威;明明係「拉布」,又話自己「跟規矩」做嘢;被港澳辦、中聯辦點名批評嘅公民黨立法會議員郭榮鏗,噚日見記者仲「理直氣壯」,攞《議事規則》出嚟話自己根據《基本法》同《議事規則》主持會議,仲恣意詆譭「一國兩制」云云。其實囍雨覺得事情非常簡單,郭榮鏗明明係「拉布」、想拖死議會,直接話自己「抗命」咪得囉,做咩「敢做唔敢認」呢?唔通真係怕俾人DQ?
 
盲反派擺明「拉布」 讓事實說話
 
對於郭榮鏗話自己跟《議事規則》做嘢,間接否認「兩辦」指控佢有違誓言、惡意「拉布」,囍雨喺度不如同大家回下帶,睇下盲反派議員最近講過啲咩!例如喺今年1月初,郭榮鏗對於內會未能選出正副主席,就直言如果政府執意推行《國歌法》、辱警罪等具爭議議題,議會就無辦法好似政府口中所講咁「正常運作」;幾日之後,佢黨友、近日被「酒吧聚會」醜聞纏身嘅立法會議員陳淑莊,就話希望市民明白,盲反派拖住內會係為香港擋住「惡法」,因為政府想通過《國歌法》。
 
講再近少少,就講噚日盲反派見記者,立法會議員毛孟靜就直言如果唔係有「惡法」,就唔會有議員「拉布」,仲稱「拉布係一個有良心嘅議員推倒惡法嘅議最後手段」;講到呢度,唔好話明眼人,就算唔理政治、唔熟政治嘅人都會判斷到,郭榮鏗堅稱自己按《議事規則》做嘢,只係佢「拉布」又唔肯承認嘅藉口嚟啫!
 
內會、財委會均為拉布「重災區」
 
事實上,內會選唔到主席,關係到14條法案同80多條附屬法例,就算係無爭議嘅增加產假法案,都審議唔到;內會以外嘅財委會,慘況亦比內會「不遑多讓」,囍雨記得大約喺兩個月前,先至有一班建造業代表出嚟訴苦,話幾百億撥款喺財委會「候審」,搞到建造業雪上加霜。所以議員「拉布」,主要受影響嘅唔係政府,而係等緊工程撥款通過、法案通過而受惠嘅普羅大眾!
 
基於盲反派自己「自打咀吧」嘅言行,郭榮鏗等人嘅實際行為,話郭榮鏗有違誓言甚至瀆職,絕對一啲都唔過分。喺呢度,囍雨認為大家都要支持政府、建制派議員採取行動,撥亂反正,唔好再俾盲反派搞亂議會,搞亂香港!

原圖:大公報

請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


22
嬲爆
6
唔係呀哇
3
驚訝

評論