出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
郭榮鏗「自曝其短」
郭榮鏗「自曝其短」

喺好耐之前,囍雨同一位喺立法會工作咗好耐嘅前輩傾偈,前輩問囍雨,知唔知盲反派議員嘅最大弱點係咩,囍雨表示疑惑,呢名前輩就指出,盲反派議員嘅最大弱點,就係佢哋根本唔識經濟,仲話如果香港俾佢哋「管」就「大件事」;囍雨日前睇到公民黨立法會議員郭榮鏗有篇講香港自由度、經濟問題嘅文章,就即刻諗番起前輩嘅一番說話。其實郭榮鏗係大律師,唔熟經濟都好正常,但講到香港當前經濟弱點,佢唔係睇唔出係因為黑暴運動作亂呀?

 

對不到焦的分析

 

郭榮鏗篇題為《失去第一的反思》嘅文章,同其他盲反派政客以至《生果報》嘅分析,可以話係如出一轍,因為佢哋大抵都係話《逃犯條例》修訂以至「依賴內地」等等,令香港嘅經濟以至自由度「出問題」。有評論就認為,郭榮鏗一番分析反映佢以至其他盲反派議員唔識經濟;囍雨覺得件事其實好簡單,盲反派議員除咗未必識經濟之外,佢哋一係就連基本常識都欠缺,一係就連事實都唔願意面對!

 

點解囍雨咁講?其實黑暴運動肆虐香港大半年,大家只要稍稍看清楚黑暴嘅影響,都會見到暴徒打砸搶燒、殺人放火,除咗大大影響營商環境之外,外地以至內地投資者,好多都俾黑暴運動所嚇怕;喺呢個前提下,無論係香港嘅經濟環境以至自由度等,都一定會被黑暴運動所影響,郭榮鏗分析香港經濟「弱點」,但隻字不提黑暴禍害,大家真係要問下佢,佢係真唔知,定係扮唔知咩事先?

 

政治凌駕理性

 

對於一份關於經濟自由指數嘅報告,唔同人當然可以有唔同演繹,對於盲反派關於「依賴內地」同《逃犯條例》修訂嘅分析,老實講,囍雨其實唔係好認同。如果講前者,中國依家係全球聚焦嘅市場,香港借內地經濟起飛「分一杯羹」,既係世界潮流,亦係香港作為中國特區可以享有嘅優勢,點會優勢變劣勢?至於《逃犯條例》修訂問題,囍雨又係果句,如果堵塞法律漏洞係「壞事」,咁香港繼續成為「逃犯天堂」,唔通先至對香港「自由度」有好處?

 

其實講到底,香港喺過去大半年經濟之所以咁差,一來因為黑暴,二來因為疫情,盲反派咁多分析,偏偏唔講暴徒做過啲乜、點破壞香港,根本就係想轉移視線,將暴徒打爛香港嘅責任,都推卸到港府以至中央身上,為佢哋日後繼續鼓動黑暴埋下伏線!


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

21
嬲爆
3
唔係呀哇
2
驚訝

評論