聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
請陳健民享受「案底令人生更精彩」
請陳健民享受「案底令人生更精彩」

「違法佔領」發起人之一陳健民兩日前(14/3)刑滿出獄。廣男睇新聞,重獲自由嘅陳健民,梗係相當開心啦;對於「監房裡的艱難日子」,陳健民就聲稱自己「完全無一刻後悔」,仲扮晒英雄咁款,話呢啲係「爭取民主必須付出的代價」。廣男好奇,陳健民坐監,真係冇一刻後悔?定係想以「過來人」身份言傳身教,叫其他因為犯法而坐緊監、或者有可能要坐監嘅年輕人唔好後悔啊?!


不認罪 還好意思講「公民抗命」?


廣男一向都話,最睇唔起陳健民(當然仲包括戴耀廷)呢班人做咗又唔認數又要享受「光環」。如果大家有印象,陳健民臨出冊前,就寫咗篇題為《佔中案為何上訴?》嘅文章,講咗一堆例如「公民抗命的案件與一般的刑事犯罪不能等量齊觀」之類嘅理論,為自己日後上訴鋪路;依家出咗監,當然繼續秉承呢套理論,仲話自己雖然刑滿,但「控罪中有不合適之處,為免將來有不當案例,所以要上訴」。廣男真係覺得陳健民都幾可笑,自己連罪都唔肯認,仲好意思講「公民抗命」?


其實對於陳健民等人嘅所謂「公民抗命」乃至「違法達義」,廣男喺度可以話畀大家知,呢啲從來都只係佢哋迷惑甚至煽惑公眾嘅藉口。陳健民自己都講過,「公民抗命」元素,包括「非暴力」同「願意承擔法律責任」。但大家諗下,當年違法佔領好、依家黑暴又好,有冇「非暴力」過呢?而且,當陳健民講到「必須付出代價」時,大家應該反問陳健民一句,既然係咁,點解你又要上訴?一個煽惑完年輕人去犯法、又「睇唔到」暴徒暴力嘅人,自己犯法又唔認罪,仲要上訴,呢個世界有冇咁嘅「公民抗命」啊?!陳健民違法,又有何「達義」可言!


被捕者要及早做好身體及心理準備!


尤其陳健民出獄之後仲講到,希望日後與被捕嘅示威者「分享自己在獄中心得」,仲話假如對方第時「一旦入獄」,要及早做好身體及心理準備,「讓坐牢時能過得更有意義」,即係點?陳健民好似仲喺度想鼓勵更多後生仔去犯法去坐監?廣男真心想講,陳健民,你算吧啦!你班同路盲反派成日話「案底令人生更精彩」,你依家咪「人生精彩」囉!點解仲要一邊自己搞上訴,一邊煽惑更多後生仔去犯法呢?請你放過香港嘅年輕人,放過香港啦!


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

3
搞笑咩
15
嬲爆
7
唔係呀哇

評論