缺德林卓廷 涉性騷擾女警司?
缺德林卓廷 涉性騷擾女警司?

曾經俾前黨友狠批「人格卑劣,毫無政治道德」嘅民主黨立法會議員林卓廷又有醜聞。日前喺立法會財委會上,討論緊警署內隔音設施時,林卓廷竟然對住一個女總警司「舉例」,指警方「放蛇」時,「你使唔使去賣過淫呀?」,結果又被狠批,連平機會都發表聲明,直指林卓廷言論令對方感到尷尬、受冒犯甚至侮辱,亦可能觸犯《性別歧視條例》內有關性騷擾嘅條文。呢單嘢,簡單而言就係林卓廷涉嫌性騷擾、侮辱女士,點解唔見佢公開道歉?!

 

歧視、侮辱、失德

 

林卓廷一句「你使唔使去賣過淫呀?」,廣男覺得至少涉及三個問題,第一佢兜口兜面喺女性面前講「賣淫」,就如平機會所講涉及性別歧視;第二就係佢喺議會都敢侮辱女性,咁佢喺議會外嘅言行,相信令人更難接受;第三,作為立法會議員,佢應該比一般人有更高嘅道德操守,但佢竟然無以身作則,反而用一啲有歧視甚或性騷擾嘅言論去令女士感到尷尬、受侮辱,品德極度有問題。

 

對於林卓廷疑似作出性騷擾言論,好抱歉,大家唔容易追究到林卓廷,因為誠如平機會所指,議員在議會內嘅言論及表達自由受權力及特權法所保障,廣男嘅理解,即係佢喺議會內「講乜都得」!不過,咁樣唔代表大家唔可以聲討佢,因為佢公然發表侮辱女性嘅言論,大家要keep住發聲,逼佢道歉!

 

還涉觸犯《防賄》條例

 

除咗最新呢單疑似性騷擾案,廣男要喺度再次溫馨提示大家,其實林卓廷「涉案」,係唔止一單咁少,佢早前喺一個記者會上面高調宣稱某警司正受廉署調查,有可能觸犯《防止賄賂條例》第30條,有關禁止披露受調查人身份等資料嘅法例;佢作為「前廉署調查員」,唔知佢有冇俾廉署拘捕呢?如果佢被撿控又罪成,佢「前廉署調查員」嘅身份,又會唔會令佢「罪加一等」?

 

被前黨友批評「人格卑劣」、同林子健一齊出嚟「做故仔」以至涉嫌違反《防賄條例》,依家仲被指涉嫌性騷擾,林卓廷如果係民主黨嘅「未來之星」、一個「標誌」,廣男只能輕嘆一句,以前叱吒風雲嘅民主黨,已經變成專「收藏」無德之人嘅政棍團體。大家如果有機會見到林卓廷,記得問佢會唔會就疑似性騷擾言論道歉,會唔會就涉嫌違反《防賄條例》一事去廉署自首!


圖片來源:RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

 

29
嬲爆
2
超無奈
3
無意見

評論