為政治 不惜虐老?
為政治 不惜虐老?

廣男今日想同大家先分享一件真人真事:朋友屋企有位患有肺疾嘅長者,平日要依賴隨身氧氣機,所以每次只係可以去到一個鐘頭街。舊年「11.24區議會選舉」投票當日,呢位老人家為咗投票,已經特登提早去到票站,點知當時排隊人龍已經好長,票站職員又唔畀佢優先投票,無奈之下,老人家只得返番屋企,直到晏晝再由家人幫扶,去票站睇下「有冇可能投到票」……呢件事反映一個問題,就係每逢選舉,其實好多老人家都希望可以投下手中一票、表態發聲,但就可能因為身體原因,或者行動唔方便,而冇辦法排隊,甚至可能最終連行使自己公民權利嘅機會都冇。

 

敬老扶弱都要拗?

 

講起呢件事,係因為廣男睇新聞,見到選管會噚日公佈9月立法會選舉嘅建議指引,建議票站主任可為長者、孕婦以及行動不便人士作特別安排,包括優先投票,但有啲人(主要係盲反派)就話,咁樣「唔公平」、係「幫建制助攻」、「係政治考慮」等等。廣男想講,其實,照顧一啲有需要人士,畀佢哋有得優先投票,呢個係咪應該係大家都明嘅常識問題呢?點解「敬老扶弱」、「禮讓」呢啲基本道德,今時今日喺香港文明社會仲需要討論、甚至爭拗?仲要被政治化?係咪文明大倒退?

 

好似頭先個例子咁,廣男想講,如果長者、病患者因為自身身體狀況,好難喺票站長時間排隊嘅話,咁體恤佢哋正正係人性化嘅表現喎!有人話咁樣「唔公平」,咁不如調番轉講,如果佢哋就因為實在冇辦法、冇能力去排隊而冇得投票,咁對呢啲人士又係咪公平呢?再進一步將範圍推廣啲,如果為有需要人士作特別安排都接受唔到,廣男又想問下,咁依家香港有長者搭車優惠、交通工具都有優先座、關愛座,呢啲「特別安排」又係咪統統有違公平、應該取消呢?

 

優待長者就是幫建制?

 

另一問題,係廣男仲見到有啲分析就話,「優待長者」嘅安排係為咗幫建制派「助攻」,係政治考慮,其實提出呢啲問題,本身就好大問題,因為就算係長者,一樣有可能投票畀盲反派,呢種「長者必投建制」嘅前設,只係盲反派嘅前設。廣男反而想質問一句,秉持呢種觀點嘅人,係咪依家連長者、病人都要誣衊呢?係咪為咗政治,就可以虐老呢?


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

1
唔係呀哇
18
嬲爆
1
令人傷心

評論