《頭條新聞》不是新聞節目 就可以失實誹謗?
《頭條新聞》不是新聞節目 就可以失實誹謗?

港台節目《頭條新聞》對警方作出不實指控,俾社會人士質疑佢哋誹謗警方。對於港台、港台工會以至港台機構傳訊代表嘅回應,囍雨聽到都唔知好嬲定好笑,一時話係嬉笑怒罵節目,一時又話編輯自主,但就完全唔回應內容完全無事實基礎嘅指控;最新消息,就係港台機構傳訊及節目標準組總監伍曼儀回應查詢,稱「《頭條新聞》是以嘻笑怒罵形式諷刺時弊的節目,並不屬於新聞節目」。囍雨真心唔明白,如果《頭條新聞》唔係新聞節目,咁點解港台工會會用「編輯自主」做擋箭牌?正路嚟講,有「編輯自主」嘅節目,係同新聞相關呀?否則就唔係「編輯自主」,係「創作自主」啦!


關鍵是內容無事實根據


用得「編輯自主」四個字,囍雨實在諗唔明點解唔係新聞節目,除非港台機構傳訊代表認為港台工會關於「編輯自主」嘅回應有誤。但問題又嚟喇,如果《頭條新聞》唔係新聞節目,係咩節目?「嘻笑怒罵形式諷刺時弊的節目」,係咪戲劇節目,純屬創作?如果係嘅話,咁應該加番句「節目內容、情節純屬虛構」,以免被人以為佢哋亂作指控喎!


老實講,港台依家先講《頭條新聞》唔係新聞節目,好明顯係想迴避外界指《頭條新聞》失實指控警方一事;如果港台咁樣可以蒙混過關,咁以後《頭條新聞》咪連法律都管唔到?係咪一句「唔係新聞節目」,就可以對他人作出不實指控甚至誹謗?係咪一句「唔係新聞節目」,就可以發表歧視言論?無論嬉笑怒罵好,嘲諷也好,都要基於事實,《頭條新聞》嘅問題,在於節目內容唔係基於事實,換言之係誹謗緊警方,港台相關人士應該正視問題。


港台始終迴避問題


所以綜觀港台「千千萬萬種理由」,就係完全唔回應外界批評《頭條新聞》詆譭警方嘅問題,囍雨真心想問港台,係你哋心虛、自知理虧,所以由始至終都唔敢正面回應批評?定係你哋覺得自己係「獨立王國」,所以唔需要接受公眾監督?囍雨相信,《頭條新聞》嘅不實內容經過好多新聞製作人員甚至監製級人馬審批,唔理係高級定低級,甚至係港台嘅管理層,都必須為事件負責!一個傳媒,仲要係公營廣播機構,俾人踢爆佢不實指控甚至誹謗他人,竟然可以到今日都唔道歉,又無人需要負責,港台一干人等,太有「霸氣」喇掛! 


圖片來源:RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

 

26
嬲爆
5
超無奈
2
無意見

評論