聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
政治入腦 無藥可救
政治入腦 無藥可救

「違法佔領」發起人戴耀廷上星期寫咗篇〈抗命、抗疫、抗爭〉嘅文章之後,惹嚟外界批評佢將抗疫政治化;廣男見到今日戴耀廷又出咗篇「下集」,叫〈自救、自治、自主〉,一開頭就話外界對佢嘅批評「實不恰當」,跟住又為自己辯解,「我的專長是憲政,不是流行病醫學。我只是基於我的學術認知,指出這場疫症的根源,不只是天災,更在於人禍」,睇到呢度,相信大家基本上可以估到,戴耀廷接住落去要講啲乜,不過廣男喺度首先要請教戴耀廷呢位「法律學者」,喺佢嘅「學術認知」裡面,又有冇唔認罪、唔想承擔罪責嘅「公民抗命」呢?大家又應該諗下,如果要講香港社會真正嘅「病毒」,唔係「違法達義」咩?

 

繼續抗疫政治化

 

對於疫症當前,戴耀廷呢篇依然極具政治色彩嘅文章係咪繼續奉行將「抗疫政治化」,廣男留畀大家自行判斷,不過對於其中一啲論調,實在有必要商榷一下。例如戴耀廷講到「香港未能有效抗疫」,係因為「在位者以政治考量蓋過科學及市民的顧慮」,「一天這病毒不除去…未來還是會有其他疫症或天災,被體制病毒所放大而失控」;按照戴耀廷嘅「自救」理論,就係藉着抗疫建立「自治網絡」,繼而「自治網絡自然要透過所有可行方法,包括選舉投票,把體制的權力由脫離港人的中央代理人及中共官員手上奪回來。」大家明啦!講嚟講去,又係選票、又係「立法會選舉能否奪半」,講得再白啲,又係「奪權」。

 

當戴耀廷不斷由抗疫「延伸」到「體制病毒、體制問題」,藉此抹黑、攻擊政府、「一國兩制」以至國家政權時,廣男要問下,究竟「一國兩制」有咩問題先?「一國兩制」之下,香港「體制」又有咩問題呢?尤其當戴耀廷呢班反政府人士不斷以「一國兩制」保障之下嘅自由,去攻擊「一國兩制」「有問題、冇自由」嘅時候,大家要明白,香港真正嘅問題,係有戴耀廷之流不斷煽動啲青年、後生仔去違法先真!大家平心而論,香港過去幾年,無論「違法佔領」又好、「旺暴、黑暴」又好,邊次冇「違法達義」嘅身影?承上所述,真正侵蝕香港社會嘅 「病毒」,正正係所謂「違法達義」、「公民抗命」呢啲歪理邪說,而戴耀廷就係呢種病毒嘅「超級帶菌者」!

 

想「播獨」又唔夠膽認?

 

另一個問題,當戴耀廷講到「透過所有可行方法,包括選舉投票,把體制的權力由脫離港人的中央代理人及中共官員手上奪回來」時,大家又應質問一下,戴耀廷係咪喺度暗示緊啲咩呢?係想搞「港獨」?定係宣揚「暗獨」?廣男想講,呢位「法律」學者將呢啲嘢講得咁「隱晦」,係咪夠膽講又唔夠膽認呢?其實一啲都唔出奇啊!大家唔好忘記,之前戴耀廷叫人去「抗命」,佢自己咪一樣唔想認罪,唔想找數!

 

廣男真係想同戴耀廷講句,依家全城防疫抗疫,大家都齊心專心,戴耀廷仲要「政治病」上腦,事無大細、天災人禍,佢就依舊滿腦子政治問題、政治利益。廣男奉勸一句:病菌入體,仲有醫護可以救你;「邪毒」入腦,根本無藥可救!


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

31
嬲爆
2
唔係呀哇
2
驚訝

評論