出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
「全面去看」港台 就可以誹謗?
「全面去看」港台 就可以誹謗?

一句不實指控,就係不實!一句說話誹謗到其他人,就係誹謗!一個簡單不過嘅道理,偏偏港台相關人員好似完全唔明白咁;港台《頭條新聞》不實指控警方,嘲諷警方「防疫裝備多、唔駛點做」引起軒然大波,但港台、港台工會就用「嬉笑怒罵」、「編輯自主」做擋箭牌,令到社會更憤怒。最近,港台機構傳訊及節目標準組總監伍曼儀亦加入「狡辯行列」,呼籲「不要只看一集或者幾分鐘,要全面去看《頭條新聞》」,囍雨想問下,伍曼儀言下之意,係承認《頭條新聞》有部分有問題?定係想人「全面去睇」《頭條新聞》,唔好睇佢有問題嘅地方?


對於港台高層嘅最新一番辯解,囍雨只能夠用「神奇」去形容,「全面去看」港台、《頭條新聞》,當然可以,但其他人一樣應該照去睇《頭條新聞》有問題嘅地方,而唔能夠話「全面睇啦,有問題果啲由佢啦」!好簡單一個道理,如果一個中學生喺學校同人鬧架,用粗口辱罵教師,呢個學生對住訓導老師,可唔可以同老師講「唔好睇我果一、兩句粗口啦,要全面睇我果番說話」?又或者,如果有人對其他種族、膚色嘅人作出人身攻擊,用言語歧視人哋種族,去到平機會,又可唔可以話「唔好剩係聽我歧視人種族嘅幾句說話,全面去睇下我講乜啦」?港台呢種「全面去看《頭條新聞》」嘅辯解好似好有道理,實則就係歪理!


港台始終迴避失實問題


如果大家留意到港台、港台工會以至依家機構傳訊代表嘅回應,其實好容易就發現一樣嘢,就係佢哋全部,係全部,根本完全無實質回應過外間嘅批評,外界嘅批評在於《頭條新聞》喺無事實根據嘅情況下嘲諷警方「防疫裝備多」等等,點解港台不同代表完全唔講下呢個指控係咪失實,係咪誹謗呢?如果真係認真地回應,點解唔講下港台製作人員或者主持係咪喺嘲諷前,資料搜集做得唔夠嚴謹,所以發表失實指控呢?坦白講,港台「口號式」回應指控,其實等同於無回應過任何指控。


作為《頭條新聞》主持人之一嘅曾志豪,日前有篇文有「談論」到相關事件,但一樣無正面回應過批評,而係話「如果林鄭可以一早公開交代政府物資去向,便不會有此局面,如果警隊能詳細交代他們英勇的防疫工作和需要,市民也不會有此懷疑」,囍雨真係想問下,呢段說話嘅意思,係咪想話《頭條新聞》係對警方作出不實指控,不過「責任」在於政府、警方無交代好佢哋嘅防疫物資或工作?港台呢種做錯事仲可以用「千萬種」理由去話返人哋「錯」嘅手法,真係睇到人眼都凸! 


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

26
嬲爆
0
唔係呀哇
0
超無奈

評論