朱凱廸「鍵盤播毒」
朱凱廸「鍵盤播毒」

一場疫症,令人睇到人性光輝,亦令人睇到人性醜惡。特區政府派包機去日本接走滯留喺鑽石公主號嘅香港居民,一個完全出於拯救香港人嘅決定,都可以俾盲反派政客諸如朱凱廸抹黑。網上流傳一張旅遊巴(相信是接滯留港人去日本機場嘅旅遊巴)相片,上面有張標語寫住「走,咱們回家!」,朱凱廸「就以香港人才會明白當中的荒謬」嚟形容國家協助香港搵旅遊巴!朱凱廸啊朱凱廸,你唔做實際嘢幫手抗疫都算啦,依家連國家、特區做嘢救人都要抽水抹黑,你仲有冇良知良心,仲有冇得救呀?


連環發帖 抽政治水


喺社區平台發完一個帖抽政治水,朱凱廸都依然意猶未盡,仲要喺社交平台出多篇文,稱「祖國旅遊巴 豉油大過雞」,仲質疑內地要借香港包機運內地人來港。廣男真係睇到眼火爆,朱凱廸話內地出「豉油」,咁廣男又想問朱凱廸,你出過啲咩?口水呀?仲有,其實噚晚、今朝政府都講過包機上全部都係香港居民,朱凱廸唔知咩?退一萬步講,就算之後包機有空位而接埋內地人或者其他國家嘅人,呢啲係出於人道理由救人,又有咩問題?


廣男覺得,朱凱廸咁樂於抽政治水,同佢以至其他本土派議員一直利用任何機會抹黑內地同中央嘅作風一脈相承;只不過,如果係政治議題,大家就算唔同意,都懶得理你哋,但依家講緊嘅係內地同香港合作救人,事關人命,朱凱廸仲要喺某啲「關節位」搞事,可見朱凱廸連基本嘅良知同道德都欠缺!


鄭泳舜救人 朱凱廸串人


相比之下,廣男真心覺得建制派今次就做得好好多,例如民建聯立法會議員鄭泳舜,直頭親身將物資帶去日本送俾滯留喺鑽石公主號嘅香港人,甚至走訪欠缺隔離、防疫設施嘅醫院,為嘅只係幫到香港人,幫得一個得一個。計埋已經確診咗新冠肺炎嘅港人,船上船下嘅香港數以百計,呢啲全部都係命嚟,朱凱廸等人有冇做過啲咩去幫佢哋?見到其他議員咁樣出心出力幫手,朱凱廸仲好意思喺Facebook攞光環、想佔領道德高地?醜唔醜呀?呢啲係唔係言行醜陋?


喺我哋面前,表面上最大既敵人係新冠肺炎,實際上盲反派政客專喺抗疫時抽香港後腿,一樣係我哋嘅「最大敵人」!朱凱廸呢一種散播仇恨、「病毒」嘅手法,根本就係當其他人出錢出心出力救助港人,佢哋就玩「鍵盤播毒」,實行有理無理,都喺度搞事,令社會更亂,令有心人抗疫更困難!


圖片來源:RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

60
嬲爆
3
超無奈
2
無意見

評論