出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
大賊重臨香江
大賊重臨香江

幾年前有套電影叫《樹大招風》,故事講述三個生活喺同一年代嘅大賊,佢哋作案、潛逃到最後被捕嘅故事,有評論話電影所反映嘅,係香港回歸前,即8、90年代嘅「大賊年代」,而呢個年代已經一去不復還。囍雨實在估唔到,喺警方嚴厲執法、罪案率降低嘅年代,香港會再次出現大賊,不過新出現嘅「大賊」,唔係打劫金行,亦唔係打劫銀行,而係打劫廁紙。「廁紙、口罩好比黃金」呢個說法,原來係真嘅!

 

持刀打劫廁紙

 

噚日唔少傳媒爭相報道,有搬運工人喺旺角某超市搬貨入舖時,三名賊人亮刀指嚇搬運工人,「純熟迅速」地搶去50條共600卷廁紙,再用手推車將廁紙推走;案發後五小時,警方憑「天眼」追縱,成功起回「贓物」同拘捕兩名男子,兩個《樹大招風》式嘅大賊,迅速「落網」。無獨有偶,噚日一名印傭因為冒認收件人「呃」口罩被判監,成為新冠肺炎以來第一個因為口罩而被判監嘅人。廁紙、口罩,成為「大賊」、騙徒嘅新目標,到底係社會出現疫症、病毒,定係我哋嘅社會有病?

 

因為出現恐慌,有市民搶購廁紙、口罩,係鐵一般事實,但囍雨想指出,除咗口罩仍然短缺外,其實香港嘅廁紙、紙巾,供應十分足夠,根本唔需要「搶劫」或「搶購」;噚日,囍雨身邊就有唔少朋友傳來相片,一啲超市內嘅廁紙多如「一座座山」,實在無需要去「搶」,更唔需要幫屋企積存大量存貨。

 

「囤積」廁紙絕非好事,短期效果會令社區內有需要人士喺一時之間買唔到廁紙,自己亦會因為「搶購」廁紙而買貴貨。更重要嘅係,積存咁多廁紙,除咗廁紙有可能藏菌之外,啲廁紙仲可能會因為潮濕而變質,過分「囤積」廁紙,隨時「好事變壞事」。

 

相爭不足 相分有餘

 

所以,當有人樂此不疲地「囤積」廁紙時,囍雨必須指出,咁做對自己、對其他人都無好處。「相爭不足,相分有餘」,如果大家已經有足夠存貨,例如夠用一個月,囍雨就請大家唔好再「搶購」,社區仲有好多貧苦階層,或者仲未買到廁紙。疫症當前,我哋最需要嘅係理性,而唔係盲從其他人,見到人哋搶購乜,我哋就去搶購,否則得益嘅就只有借機圖利嘅人。 


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

1
驚訝
0
無計啦
0
無意見

評論