出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
借疫症行騙 必須嚴懲!
借疫症行騙 必須嚴懲!

全城「搶口罩」,好多市民都為咗「撲口罩」勞心勞力,喺呢個抗疫時期,竟然有騙徒利用市民嘅焦慮心理行騙,稱「先俾錢後發貨」,但最後口罩同人都「無影無踪」;警方公布,至今累積接獲超過300宗有關網售口罩嘅騙案,涉款超過100萬元,警方前日拘捕咗兩名男子涉嫌詐騙,唔排除有更多人被捕。囍雨認為,行騙係嚴重罪行,利用疫情行騙,更係不可寬恕嘅罪行,警方一定要用最大力度執法,令歹徒得到應有懲罰!

 

不抗疫 還行騙

 

囍雨相信大部分港人,已經深深感受到「撲口罩」嘅苦況,有人為咗口罩,到唔同商店通宵達旦排隊;有人為咗口罩,用比平時多十倍嘅時間上網;亦有人為咗口罩,四處找親朋戚友幫忙,好似家庭出咗「大問題」咁。任何有同理心、同情心嘅人而又有能力嘅人,都想為其他人出一分力,但竟然有騙徒利用其他人嘅恐慌心理行騙,囍雨覺得絕唔能夠接受。

 

從法治層面睇,有人犯法警方就要執法,但今次「網上口罩騙案」,囍雨認為比起其他騙案更嚴重,因為唔少市民本來寄望自己「買到口罩」可以比自己、家人「應急」,到頭來俾人呃錢,連本身寄予厚望嘅口罩亦「一個都無」;如果大家係當事人,一定極度失望!容許囍雨用最嚴厲嘅語調譴責騙徒,你哋連作為人最基本嘅道德、同情心都欠缺,絕對要接受法律最嚴厲嘅懲罰!

 

請警方大力執法!

 

所謂「野火燒不盡,春風吹又生」,就算警方拘捕咗部分騙徒,都肯定會有其他無良心嘅不法之徒行騙;所以,囍雨希望警方除咗加大力度監察、執法之外,拘捕、檢控罪名亦應該「從嚴不從寬」,以最具阻嚇力嘅罪名將證據交俾律政司,律政司亦應該喺可行情況下盡快檢控,以阻嚇其他想犯案嘅人!

 

世間上,賺錢嘅機會有好多,但賺錢應該「取之有道」,一啲借疫症將物資抬價嘅商家,囍雨已經十分卑視;依家又不斷出現借「口罩荒」行騙嘅人,囍雨覺得呢啲人直頭係社會敗類。就算個別騙徒能夠逃避法律制裁,但佢哋利用疫症行騙,囍雨真心想問下,呢啲錢,佢哋用得安落?無受良心責備咩? 


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

8
嬲爆
0
好慘呀
3
令人傷心

評論