聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
互爭不足 互分有餘
互爭不足 互分有餘

疫症壓境,但香港依家就「一罩難求」,於是唔少人想方設法,遠赴日本、韓國、東南亞國家搶購入貨。廣男日前見到朋友傳嚟一張圖片,原來貨源緊缺下,日本一個小鎮藥妝店嘅口罩亦被搶購一空,貨架上空空如也,但該店貼出嘅一張告示就頗有意思,以日文寫道:「沒有不停的雨,天一定會睛,互相爭就不足,互相分就有餘」。將呢句話套用喺今時香港,唔知又會唔會令大家有所觸動、有所啟發呢?

 

是物資問題 更是道德問題

 

為咗防疫,人人都需要口罩傍身,因此近期香港幾乎隨處可見為咗五個、十個口罩四處奔波、大排長龍嘅景象,其中更不乏年老體弱嘅長者身影,甚至有啲市民即使捱更抵餓、通宵達旦,依然「千金難求一口罩」。但另一邊廂,亦有一啲有辦法、有渠道「搞到貨」嘅人士、商家,竟然喺呢個時候大量囤貨、或者趁火打劫、坐地起價,大發瘟疫財、人命財。廣男想問,呢啲人有冇諗過,其實仲有好多工種、崗位,例如前線醫護、清潔工人、需要廣泛接觸客戶嘅從業員、維持社會治安嘅警隊、駐守隔離營嘅工作人員等等,佢哋更急切需要口罩呢?

 

有一種講法廣男覺得幾有道理:你有「10個」,係應得;但你搶「100個」,就係剝削緊別人。一個口罩,係物資問題,亦都係道德問題。尤其依家「非常時期」,仲有人大量囤貨,或者坐地起價,廣男認為政府唔可以坐視不管,唔規管嘅結果,最受苦嘅就係最基層嘅市民大眾,尤其係老人家、貧窮人士、弱勢群體。

 

依家政府仍然話「無計劃立法規管口罩價格同供應」,但廣男想講,呢種「自由經濟」嘅理念,喺「安穩」時期的確值得肯定,但依家「戰時」,又係咪可以轉變下思維呢?一句「無意立法規管」,係咪就等於完全「冇嘢可做」呢?

 

真的忍心讓市民「繼續捱」?

 

廣男就係度諗,政府係咪可以請消委會做下調研,查下有冇過分抬價或者賣黑心口罩嘅商戶,然後制訂出一個名單再公諸於眾;如果怕「規管」影響商家「入貨」,但其實,入貨入咗幾多錢係一回事,佢哋賣出去「食水有幾深」,又係另一回事喎,政府就算規管唔到成本,咁規管下「利潤」唔好咁離譜,又得唔得呢?如果任佢哋「自由抬價」,咁咪即係「天價成本+天價售價=貴上加貴」?不妨多睇睇頂住寒風長時間排隊嘅老人,再睇睇以高價換得幾個口罩甚至空手而回嘅貧苦市民,政府真的忍心嗎?

 

廣男係度亦都必須勸果班無良人士、無良商戶一句,以前大家成日講「黃藍是政見」,但今時今日,「救人先係良知」!不如多反思下「互相爭就不足,互相分就有餘」呢句話,搵番自己嘅良知吧!


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

1
令人傷心
2
超無奈
2
好慘呀

評論