聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
「搞搞震、冇幫襯」的區議員
「搞搞震、冇幫襯」的區議員

新型肺炎疫情持續肆虐,上星期政務司司長張建宗宣布暫停未來兩星期嘅區議會會議,亦唔會提供場地及秘書服務,但由盲反派把持嘅大埔區議會一於少理,居然自備「大聲公」、枱枱櫈櫈,去到大埔墟街市及熟食中心2樓平台露天台,召開第一次醫療、教育及社會服務委員會會議,話要討論疫情、大埔醫護人員裝備不足同賽馬會診所列為新型肺炎診所等嘅問題。廣男見到咁嘅情況都想問一句,咁樣究竟係真心務實開會?定係又想扮開會、做Show俾人睇?


提出多項離譜的動議


其實唔單止開會模式搞笑,連討論嘅議案都相當離譜,嗰日一開會,大埔區議會主席關永業就即刻提出臨時動議,譴責張建宗單方面取消區議會會議,不尊重大埔區議會;當呢項動議獲得通過之後,其他盲反派議員繼續搞事,一時動議促請醫管局不追討罷工員工,一時又動議反對大埔賽馬會診所被列為新型肺炎嘅指定診所等,甚至動議促請特首、張建宗司長同「一哥」鄧炳強,率領前線警員前往武漢疫區抗疫。


動議對抗疫有何實質幫助?


廣男首先要問一句,佢哋講呢啲動議,究竟對抗疫防疫有咩實質幫助先?大家不如睇下,例如唔追逃罷工醫護,咁對於權益受影響嘅病患,要承擔更多工作、責任嘅其他醫護,呢班區議員有冇幫過一句呢?又例如反對指定診所救治新型肺炎患者,呢招除咗煽動區內市民仇恨情緒之外,又對防疫工作有何幫助呢?至於官員、警隊派人去武漢,聽落好似係威係勢,諗深一層,有冇實質可行性呢?呢班區議員係咪又搞越權呢?更重要嘅一點,佢哋除咗批評呢樣、譴責果樣,又有冇提過一件真係有可行性嘅防疫辦法?冇!廣男想講,呢班盲反派議員根本就係「搞搞震、冇幫襯」,不務正業!


疫症當前,一眾盲反派仲要唯恐天下不亂,不斷煽動市民對政府、警隊嘅仇恨,甚至利用市民對疫症嘅恐慌情緒,針對政府徵用部分設施作診所或隔離營來大造文章,鼓動市民表態反對,但係依家醫院服務供應緊急,隔離營亦有人滿之患,如果問題一路無辦法解決,防疫、抗疫工作就會出現「缺口」,最終「惡果」咪又係市民嚟承受返!廣男喺到呼籲盲反派議員,唔好再為反而反」,如果真心為市民防疫,區內仲有好多實質工作可做,例如了解下大廈水渠有冇問題,清潔下社區環境,又或者為市民免費派發口罩、消毒液等。唔好忘記,呢啲本來就係你哋份內事!!


原圖:RTHK


請Follow我們的YouTube頻道:

https://bit.ly/2kgU8qg


 
下載我們的手機應用程式,收看第一手精彩內容:

https://www.speakout.hk/app


18
嬲爆
2
超無奈
3
無意見

評論