聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
罷工罷到「財神到」?
罷工罷到「財神到」?

「財神到,財神到,好走快兩步」,每逢農曆新年,大家都會聽到呢首《財神到》應節金曲,要「財神到」,一般人會努力工作、力求上進,咁政客又有冇計「搵財神」呢?有嘅,籌款囉!「醫管局員工陣線」日前正式宣布罷工「失敗」,不過當外界以為佢哋係輸家之時,有傳媒報道就指,「陣線」嘅會費係每人每年300元,以佢哋有2.25萬會員推算,剩係會費應會收到或將會收到600幾萬元;計埋職工盟宣布成立基金為參與罷工嘅醫護提供財政同收入損失贊助,真係唔知「陣線」最後有幾錢。喺呢件事上面,廣男覺得萬一有「陣線」員工被處分,無可避免會成為「輸家」,至於「陣線」以至背後政客,名利雙收,反而就「無得輸」!


咁快就籌款?


工會收會員費,呢樣嘢唔難理解,但廣男就唔係好明,點解「陣線」一罷工完職工盟就宣布會成立基金支援曾參與罷工嘅會員,包括贊助金錢損失同「法律支援」呢?係佢哋已經計到有會員因為咁而有損失要「贊助」,定係佢哋「市場觸覺」好,知道呢個係籌款好時機?定還是佢哋已經預視到有人會被處分甚至解僱,所以要籌定錢先呢?


廣男要喺度溫馨提示下,盲反派籌錢嘅往績,例如籌咗近一億元嘅「6.12基金」,開宗名義係要支援因為反修例而被撿控嘅人,結果呢?結果唔少人都批評「基金」根本幫唔到被捕、被告人士,反而將部分資金用嚟贊助「同路人」搞活動,包括搞講座、租音響等等;另一支援被捕人士嘅「星火同盟」,就因為涉嫌「洗黑錢」,成個戶口被凍結埋。依家「陣線」喺未有人被處分、解僱嘅情況下職工盟就搞「基金」籌錢,想做啲咩,要啲錢嚟實則做乜,真係得佢哋自己先知!


搞手吃火鍋 會員「找數」?


廣男明白,呢個世界好多嘢都講錢,但大家認為係咪要佢哋交代清楚啲錢攞嚟做乜呢?呢兩日傳媒不斷報道一單新聞,就係「陣線」一班成員喺肺炎肆虐嘅情況下,仲成班人一齊打邊爐、飲兩杯,廣男除咗關心佢哋會唔會將細菌互相傳染,仲好關心佢哋「飲飲食食」,係咪喺度用緊「公費」(會員費)呢?如果佢哋真係「開公數」大魚大肉,咁就真係令佢哋啲會員失望喇!


原圖:文匯


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

24
嬲爆
8
唔係呀哇
6
搞笑咩

評論