【精選文章】不要在我家「後花園」
【精選文章】不要在我家「後花園」

面對疫症,大家都知道要有效對抗疫情,社會要團結一致、齊心抗疫;但說易行難,當抗疫工作或者「牽涉」到自己,唔少人都會話「唔好搞我」。最新例子,就係政府擬徵用火炭駿洋邨做隔離營,但一班政客同居民就大力反對,囍雨聽電台節目,有啲人就話「就嚟要搬入去」,有啲人就話大家都係「行同一條路」出返火炭,有啲甚至話附近啲工廠有公司嘅貨品會供應俾香港市民,一句講晒,就係抗疫「唔該行遠」啲。但個個都Say No,咁啲要隔離嘅人,係咪要送佢哋去孤島?


不隔離 就留在民居?


對於附近居民或者即將入住駿洋邨「準居民」嘅憂慮,其實大家都明白,但如果真係好似某啲火炭街坊話齋,連「行同一條路」都唔得嘅話,咁大家以後係咪連街都唔可以出,又或者連去超市購買日用品、食品都唔得呢?有啲人會以為,病毒係會透過空氣傳播,其實正確嚟講,係透過飛沫傳播先真,之前亦有醫生講過,要感染新型肺炎,其實係要將飛沫吸入喉嚨、肺部,所以大家可以擔心,但唔好過分憂心,最緊要係認清事實!


有駿洋邨一帶以至大埔同西貢嘅居民大聲疾呼「不要在我家後花園」(Not in my backyard),大家理解,但囍雨想大家明白,依家唔同喺社區附近興建骨灰龕呢啲設施,面對新型肺炎,如果無適當地方隔離啲有需要隔離、觀察嘅人,咁呢啲人會喺邊度「隔離」?最大機會,梗係喺你同我屋企附近嘅民居!唔俾人喺空置地方隔離,迫返啲人去自己屋企,隨時喺民居、社區爆發,呢個做法係咪明智呢?事實上,依家亦已經出現社區爆發嘅跡象,多一個需要隔離嘅人喺民居,真係多一分危險。


不要忘記 還有2,000港人在武漢


睇到有關隔離營嘅問題,囍雨就突然諗起依家仲有2,000港人滯留喺武漢,佢哋到依家都唔能夠被安排返香港,其實係咪因為就算俾佢哋返到香港,都無足夠地方隔離佢哋?連已經喺香港嘅人都無足夠地方隔離,又點處理到果2,000名港人?講真,出現疫症故然令人唔開心,但今次香港人嘅「唔團結」,同樣令人沮喪;面對今次肺炎,我哋實在無「自己人打自己人」、不合作嘅空間,當年擊退SARS,係因為我哋團結,囍雨真心希望大家能重拾SARS精神、團結抗疫。


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


1
點算呀
1
好慘呀
5
超無奈

評論