出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
為何抗疫都要政治化?
為何抗疫都要政治化?

話說新年前夕,囍雨陪媽媽去某間公立醫院例行覆診(與疫病無關),當時雖然疫情已經殺到,但仲未有依家咁多「硬性措施」。見到醫生,媽媽順手呈上一份半年前喺內地某市嘅體檢報告以供參考,點知呢個時候,發生令人乍舌嘅一幕:醫生一見到報告封面印有內地城市名,第一個動作係「即刻彈開」,第一句話係「你冇嘢啊!你係XX人?!」囍雨想講,作為醫生,當面對病人,你第一個動作,唔係應該打開報告認真閱讀咩?你嘅第一句話,唔係應該詢問病情咩?

 

對於個人嚟講,呢個只不過係覆診過程中嘅一件小事,惹人發笑,但細味之下,發生喺今日香港,就難免令人心寒。新型肺炎殺到埋身,大家都擔憂、驚中招,醫護亦都理應好好保護自己,但好似呢件「小事」咁,一見到同內地相關嘅嘢就「彈開」,又叫將自己健康安危託付醫護嘅患者、市民情何以堪?

 

係「恐疫」?定係「恐中反中」?

 

嚟到今日,疫情繼續蔓延,防禦工作嚴峻,政府已經出台若干應急措施,但就暫時唔包括「一刀切」全面封關。對於措施係咪有效,囍雨覺得大家可以討論、提意見;毋庸置疑嘅係,眼前頭等大事就係全城一條心,共同防疫。但囍雨今天啱啱又見到媒體報道,現時多間醫院都有醫護人員因為「不滿政府未全面封關」而醞釀罷工,其中東區同元朗某醫院,分別有廿幾個醫護集體「請病假」;早兩日,更加有人話「唔用香港公帑醫內地人」。囍雨想問,「彈開」嘅醫生又好,「請病假」以至醞釀罷工嘅醫護又好,究竟係因為「恐疫」?定係因為「恐中、反中」,所以當疫症殺到埋身時要當「逃兵」?抑或呢班人,又係為一己訴求,以政治凌駕專業,攞市民和病人當籌碼呢?

 

政治凌駕專業 不如辭職

 

囍雨無意亂猜測,只係想請大家不妨諗諗,如果喺戰場,打仗嘅士兵要臨陣脫逃,會是何後果?今日香港面對疫情,何嘗唔係一場硬仗?如果真係「怕」,不如索性辭職?至於政治凌駕專業,囍雨就認為問題更嚴重、遺禍更深遠,之前黑暴運動已經有教育界「淪陷」,以至出現大量仇警、欺凌事件,如果今日再入侵醫護界,咁將來會唔會又不斷入侵消防、警察?以後係咪逢親同內地或者內地人有關,都要「區別對待」?救人之前要問問「你係咩國籍?咩籍貫?」

 

值得慶幸嘅係,囍雨亦都見到,香港大部分醫護面對疫情依然堅守崗位、救死扶傷,他們的醫者仁心,值得大家敬佩、支持!今時今日疫症再臨,甚至勁過沙士,大家絕對唔願見到當年人命嘅代價再度重演,所以大家更加要齊心一致,一切以科學為依歸。怕,唔會令我哋不戰而勝,恨先係最可怕嘅病毒;政治先行,更加唔會幫我哋消滅病毒。


圖片來源:RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

14
嬲爆
0
超無奈
2
無意見

評論