大埔「獨立」了?
大埔「獨立」了?

新一屆區議會會期展開,外界都好關注一批議會「新力軍」會點樣「顛覆」區議會,結果唔同區嘅區議會,真係一開會就提出唔同嘅政治議題,甚至有區議會主席揚言要「重奪管治權」;話口未完,噚日大埔區議會開會,就出現該區議會要選出「保安及政制事務委員會」正、副主席,但因為其「職權」包括就區內「保安及政制事項」進行討論及統籌、監察同埋研究「區內入境事務有關的政府政策」,而俾當區民政事務專員以違反區議會條例提出「阻止」。廣男覺得呢件事真係好神奇,一個負責區內民生事項嘅區議會,竟然會討論「區內政制」同「入境事務」,乜大埔原來「獨立」咗?


區會「獨立化」?


對於大埔區議會想成立委員會討論、監察同研究區內「政制」、「入境事務」,網上平台就質疑,如果大埔「立咗國」,咁以後啲人去大埔,駛唔駛搞落地簽證?駛唔駛設立各國領事館?駛唔駛喺吐露港設立海關?甚至駛唔駛喺大埔建圍牆?廣男唔知點解有人會提出喺區議會建議成立呢種委員會,如果班區議會唔係想大埔「獨立」,就係想喺區議會想玩「惡搞」,一於將區議會職能推至「極端」,唔單止係做埋立法會、政府果份,似乎係想做埋「國家工作」喎!


之前外界都擔心,區議會俾一班盲反派同本土派「攻佔」之後,以後區議會樣樣嘢都會「政治化」,但廣男覺得呢種擔心似乎諗得太輕微,因為無論係有區議會主席稱要「重奪管治權」,以至依家有區議會要喺區內統籌「政制事項」、研究「入境事務」,班新丁似乎當咗個「地區」係佢哋嘅咁。如果政府放縱佢哋咁樣搗亂議會,相信時間再推展落去,好多區議會都會變成宣揚「港獨」、「區獨」嘅政治場所。


議會往後如何走?


喺上年11月尾嘅區議會選舉,唔少人都將對政府嘅不滿「轉化」為選票,將一個又一個本土派、素人送入區議會;依家各區區議會「各有亂象」,廣男唔知呢個係咪選民樂見嘅結果;但有一點可以肯定嘅係,以往「服務人群」嘅區議會,以後必定變為「服務政治」。所謂民生無小事,當服務居民嘅諮詢架構變成炒作政治嘅場地,黑暴歪風所侵蝕嘅,已經係我哋生活嘅每一個層面,再咁走落去,香港「危矣」。


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

19
嬲爆
4
唔係呀哇
5
搞笑咩

評論