五大訴求如何合情合理?
五大訴求如何合情合理?

自黑暴運動開始以嚟,盲反派總係「唯恐天下不亂」,一時又叫人上街「抗爭」,一時又去外國「告洋狀」,就連美國總統特朗普簽署咗《香港人權與民主法案》,擺明就係要制裁香港嘅「惡法」,身為盲反派嘅元老級人馬、資深大律師李柱銘居然撰文幫美國「講好話」,然後又「慣例」扯去「五大訴求」演繹一番,就係無論如何都要講到訴求係合情合理。廣男想請教,呢幾個月暴徒打砸搶燒、殺人放火、違法暴力,「五大訴求」入面就「要求不檢控違法人士」,單係呢一項,又係咪講得通、「合情合理」呢?

 

所有問題都歸因於普選?

 

其實李柱銘講來講去都係同一「套路」,就係無論咩問題,都要千方百計推論到所謂真普選。今日李柱銘喺《生果報》篇文章,照例先抹黑中央破壞「一國兩制」,話「回歸十年後,香港便可推行全面普選,但中共一拖再拖,令特區政制停滯不前多年」,仲講明「反送中運動不過是導火線」,香港社會民怨積壓已久云云,強調「五大訴求」係合情合理、捍衞特區嘅核心價值。但係李柱銘身為資深大律師,應該好清楚法律底線,依家居然話「五大訴求」合情合理?但係訴求邊度符合法治先?

 

「五大訴求」不符合法治

 

喺「五大訴求」之中,除咗政客不斷強調真普選,示威者最經常講嘅一條,就係「要求不檢控違法人士」,但大家係咪應該先諗吓,暴徒做過啲咩暴行先?佢地不斷喺街頭瘋狂掟磚同汽油彈,仲多次意圖「謀殺」無辜市民,又用鎅刀割警員頸,又放火燒活生生嘅市民,用鐵渠蓋重擊清路障男子,甚至用掟磚擊斃一位老伯伯,呢啲犯下嚴重罪行嘅暴徒,係咪統統唔使檢控同追究?要全港市民當咩事都無發生過、無見過?廣男請問,當反政府人士不斷要這樣那樣嘅訴求,其他香港市民又使唔使要法治呢?相反如果受害人係李柱銘,你又會唔會不追究?

 

至於「五大訴求」有關「實行雙真普選」,廣男就想問,李柱銘以至一班盲反派政客,日日將《基本法》掛喺咀邊,咁「普選」又使唔使跟《基本法》去做呢?其實《基本法》第45條已經寫得清清楚楚,「一人一票」普選行政長官係要「由一個有廣泛代表性的提名委員會按民主程序提名」;如果按照《基本法》去做,又點會係盲反派所謂嘅「雙真普選」?就算《中英聯合聲明》,都只係話特首由協商或選舉產生,李柱銘係真唔知,定扮唔明,真係得佢自己知!

 

講到底,李柱銘呢啲盲反派政客需要暴徒幫手去「衝」,再借佢哋嘅「力量」去達成政治目的,所以無論暴徒做得有幾錯、幾暴力都好,都要「死撐」落去,而且由頭到尾李柱銘都只係關心「普選」,可以點樣「奪權」,香港社會、市民畀黑暴害到有幾慘,恐怕佢都根本唔會在乎!


請Follow我們的YouTube頻道:https://bit.ly/2kgU8qg

 

下載我們的手機應用程式,收看第一手精彩內容:https://www.speakout.hk/app

41
嬲爆
2
超無奈
2
無意見

評論