起初中文大學校長段崇智因為唔肯支持學生，仲俾人叫做「段狗」，俾學生不斷圍攻侮辱鬧爆；之後一次對話，段崇智答應同涉違法學生「同行」，學生態度即刻180度轉變，仲尊稱佢做「段爸」、「段皇爺」。但好景不常，噚日中文大學又發生衝突，暴徒同警方由朝打到晚，段崇智唯有喺夜晚再同學生對話，但係一開聲就俾學生逼宮，一時要求佢叫警方「放人」，一時又幫佢設下「死線」，呢位「段爸」突然間就變咗「段人質」。廣男想問，其實到底件事點解會變成咁？係個別激進學生嘅問題，定係其實一切都係因為段崇智「縱暴」所造成嘅呢？

段崇智遭學生不斷脅逼

噚晚段崇智「出馬」同學生對話，同佢哋複述警方嘅要求，話各人只要唔再掟雜物落吐露港公路、鐵路，警方就唔會行向天橋，段崇智仲拍心口話會派保安守住橋頭，但係無論點講，學生根本都聽唔入耳，反問段崇智已經被捕嘅中大生點算，要求警方放人，又有人質問段崇智，「知唔知點解我依家要著住避彈衣？」，佢身後仲夾雜住大量粗口，段崇智即時一臉茫然，都唔知點應對，但係學生繼續糾纏、訴苦，話係警方挑釁在先，又話係警察唔收手，佢哋不停講類似嘅說話，仲提出咗兩個要求，第一就係要警方放咗中午被捕嘅中大生，第二要警方先撤退，又設咗「死線」要段崇智晚上9點前回覆，否則就再有「行動」。一時之間，「段人質」又再成為學生圍攻發洩嘅對象……

一切都是包庇學生、縱暴之過

大家可能都會有一個疑問，到底點解中大嘅情況會咁瘋狂？廣男就認為，一切都係段崇智種下嘅果，如果當初佢唔支持涉犯事學生，其他學生又點會再步步進逼？筆者亦曾預言，所謂一不離二、二不離三，逼宮事件肯定仲會陸續有嚟！就好似之前浸會大學校長錢大康咁，幫過學生會會長方仲賢出過一次頭，學生就食髓知味，包圍浸大教職員、打爛校長辦公室、要求再幫「其他」學生出頭。廣男想同各大校長講一句，「禍福無門，惟人自召」，一切後果都係自己攞嚟嘅，所有曾經向涉事學生「跪低」嘅校長、教職員，都已經開咗壞先例，如果下次唔肯答應學生嘅「訴求」，肯定會召來「禍患」，輕則被學生圍攻批評，重則俾學生大肆羞辱，其實只要一旦打開咗呢個潘朵拉盒子，就必然後患無窮！如果唔想咁樣，根本一開頭就要同涉違法學生說不，直斥佢哋嘅錯誤！

廣男想講，依家嘅教育界，尤其係大專學界都已經變咗激進示威者，甚至暴徒嘅罪惡溫床，當有學生涉嫌違法，好似段崇智呢啲校長就幫佢哋出頭、撐腰，咁到底校方知唔知學生做過啲咩？定係不問因由就一味「盲撐」？咁係咪要鼓勵學生繼續一錯再錯？如果有一日有學生被捕，呢啲曾經支持過佢哋嘅教師都要負上責任；又或者，有一日有人因為暴徒嘅「恐襲」而喪命，呢班「縱暴」教師一樣有「罪」！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app