年宵只有花
年宵只有花

黑暴運動持續咗五個月,暴亂經常不定時喺多區爆發,搞到市民周未假日都唔敢出街,好多大型活動、盛事都要被逼取消,就好似「維港泳2019」、「香港美酒佳餚巡禮」、「Formula E香港站賽事」等。點知噚日政府再公布,連嚟緊農曆新年年宵都要變陣,因應公眾安全考慮,決定抽走乾貨攤位,即係最受歡迎嘅應節精品、公仔都唔會係年宵市場出現,只有賣花卉之類嘅濕貨同快餐攤位。廣男認為,年宵市場搞成咁真係有啲掃興,必然會少咗好多「年味」。搞到咁嘅田地,大家又要多得班黑衣暴徒囉!!

 

政府有權隨時取消年宵

 

噚日食環署就宣布下年宵會係1月19號至25號,一連七日喺15個地點舉行,但就係自2000年以嚟首次唔設乾貨攤位,只有濕貨同部分大型年宵市場會有埋快餐攤位;同時,食環署新增「加辣」條款,包括政府有權延遲開始日期和縮短特許期,即係話可以隨時調整營業時間,暫停甚至取消年宵市場,而且一旦檔販喺年宵場內作出任何違法、唔道德,或者唔符合年宵市場宗旨嘅行為,食環署有權阻止,甚至可以即時解約同將攤位清空。簡單嚟講,食環署為咗應付黑暴運動,確保公眾安全,已經諗好哂計,做足準備。

 

年宵市場危機四伏

 

廣男覺得呢次政府嘅決定實在係迫於無奈,對想喺年宵搵番筆嘅小商販,或者發揮創意學吓做生意嘅學生、年輕人嚟講,肯定會有啲失望。但另一方面,大家都要諗吓,按照依家嘅社會氛圍,如果年宵市場萬一有咩意外發生,後果會點呢?尤其係依家「私了」歪風咁盛行,如果有人因為政見而動口動手、繼而私了,甚至引發大型衝突,係維園年宵呢個人多擁擠、狹窄嘅環境,後果隨時不堪設想!廣男有咁嘅擔憂,係因為「有例可循」。大家唔好忘記,2016年年初二晚,就係因為有人借「擺檔」引發紛爭,繼而引發當年嘅旺角暴動。嚟到依家,當局又點可以掉以輕心,攞公眾安全嚟開玩笑呢?

 

講真,如果社會氣氛好,相信政府都唔想搞到年宵市場冇年味,廣男今朝早聽電台節目,有立法會議員就歸咎政府,有聽眾就怪罪警察,話「冇警察就唔會有事」,甚至公民黨立法會議員楊岳橋仲大大聲話「政府怕咗香港人」。廣男必須講句:錯!係香港人怕咗黑衣暴徒!如果唔係班暴徒日日搞事,香港又點會搞到今時咁?點解又唔問吓啲黑暴幾時先肯收手?廣男甚至見到,當政府公佈年宵市場安排之後,已經有人係網上發起「和你宵」運動,揚言要自己搵地方搞年宵。廣男想講,呢招擺明又係同政府對著幹,唯恐香港不亂,大家真係要慎防為上。其實講到尾,班搞事者唔想市民可以安安樂樂過年!

 

原圖:RTHK


請Follow我們的YouTube頻道:https://bit.ly/2kgU8qg

 

下載我們的手機應用程式,收看第一手精彩內容:https://www.speakout.hk/app

3
嬲爆
0
超無奈
0
無意見

評論

你可能感興趣