師者，所以傳道、受業、解惑也。身為人師，除咗教授學生知識之外，一項好重要嘅工作，就係當學生行為出現問題，就要果敢地指出、糾正，但近日中大校長崇智就「反其道而行」，發公開信力挺涉嫌違法嘅中大學生，引起社會嘩然，好多人都批評段崇智立下壞榜樣。最近，四個警察協會嘅主席聯名致函段崇智，廣男綜合其重點，可以歸納為段崇智嘅五大不當，當中包括包庇學生、立下壞先例等等。其實，段崇智作為校長當然要支持學生，但如果學生行為出問題都仲要「支持」，咁係幫咗學生，定係害咗學生？

警察協會的嚴正指控

簡單而言，廣男覺得幾個警察協會主席對段崇智嘅批評，可以分為五大要點，第一係作為科學家未查證就公開質疑警方；第二，學生易被煽動，而段崇智似乎未有引導佢哋走上正途；第三，就係明知學生可能犯法而加以包庇、視若無睹；第四，要求喺「機制以外」處理學生對警方嘅投訴，做法人治非法治；第五，就係將政治衝突帶入校園，誓必將教育界推向萬劫不復之地。睇完呢幾項批評，廣男覺得幾個警察協會主席所講都唔係無道理。

呢幾項批評，其實都幾一矢中的，其他評論過嘅論點廣男可以唔講，但第五點廣男就一定要再講，因為段崇智為求自保，免受政治焚身，決定包庇學生、唔同學生講佢哋犯錯，已經好唔啱；而佢順住學生要求發公開信質疑警方、變相歸邊支持涉嫌犯事學生甚至支持「反政府」，一定令其他學校嘅學生有樣學樣。最壞結果，就係各間學校校長、領導層都相繼「表態」，變相大專學界都「質疑」警方、支持學生違法同埋「反政府」！

中大到港大 之後又如何？

廣男咁講唔係靠嚇，中大學生成功逼段崇智「逼宮」之後，港大有班學生已經「有樣學樣」，要港大校長譴責警方、「保護」港大生等等；如果你問廣男，源頭就係段崇智。事到如今，段崇智作為喺大專學界掀起歪風嘅「源頭」，廣男覺得佢應該企出嚟，將是非黑白講清楚，包括係咪支持學生參與違法行動，到底係支持警方執法，定堅持要同學生一齊「投訴」警方。當一個科學家以「情感」代替理性，果種「情感」唔係會帶嚟溫暖，而係會將「暴力情感」散播開去，將大專學界燒到變「頹垣敗瓦」！ 

原圖：中文大學網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app