大學生「勤學苦練」去犯法?
大學生「勤學苦練」去犯法?

如果囍雨同大家講有一班蒙面戴口罩嘅黑衣青年,齊齊舉「盾」揮「棍」互相對打,大家可能都會聯想到過往一啲示威衝突嘅場面,但係如果話畀大家知,呢個畫面竟然出現喺中大百萬大道,大家又會點睇?冇錯啊!囍雨今日就見到一條網片,內容係一班大學生喺中大搞咗個「練武班」,開班授徒傳授「防身自衛技巧」。片中所見,成班人手持自製嘅膠盾膠棍,輪流分飾「施襲」與「防禦」嘅角色,而且參與者除咗青年學生之外,仲不乏一啲年長者。囍雨睇完真係啼笑皆非,呢班人依家「習武強身」究竟想點呢?


自製閘機練跳閘


以為呢啲事情好奇特咩?未算!仲有更奇葩嘅嘢。囍雨之前睇到有報道話,有個中大學生近排仲喺學校「打造」咗一部木製嘅1:1港鐵閘機,話係為咗「還原真實感覺」、以供同學練習跳閘。講真,呢啲「奇聞」聽落就好笑,但諗落就好心寒同嘆息。囍雨喺度諗,依家啲學生有書唔好好讀,日日喺度浪費時間練習「抗爭」,究竟有咩益處呢?囍雨咁講係因為上面兩單唔係孤例,事實上一段時間以嚟,發生喺香港各大校園嘅亂象可謂層出不窮,之前已經有浸大學生聚眾打爛校長室,呢兩日網上有條片仲見到,一班科大男生夜嘛嘛喺學校裡面集體裸跑。囍雨真係唔明,點解依家啲大學生會變成咁嘅呢?


「學以致用」做暴徒?


囍雨成日覺得,有機會入到大學讀書係一件好幸運嘅事,就算依家社會因為政治事件而動盪不安,作為學生就算關心社會都首先應該做好本分,而唔係為咗投身政治而荒廢學業,更加唔應該為咗所謂「抗爭」去做犯法嘅事。但係睇過上面幾單奇聞,囍雨真係好心痛,因為見到嘅係一班大學生有書唔讀、竟然走去「習武」、練跳閘,根據佢哋嘅「學習內容」,大家諗下如果將來佢哋「學以致用」,係咪準備走上街頭變暴徒或者做一啲違法嘢呢?就好似噚晚咁,又有個後生仔喺港鐵沙田站跳閘,最終又引發衝突事件,300幾人大肆破壞港鐵沙田站。呢啲又係咪我哋想見到嘅大好青年呢?


而另一個更加令人心寒嘅問題係,當依家好多學生捲入政治、不務正業嘅時候,點解又見唔到有幾多老師、家長企出嚟制止或者指正佢哋嘅錯誤呢?如果大家有印象,之前已經有小學生參加示威人鏈、有中學生身穿校服大唱辱警粗口歌,依家又見到大學生「勤學苦練」如何企圖去犯法,囍雨想講,成個社會係咪應該認真諗一諗,呢啲就係我哋寄予厚望嘅未來主人翁?所謂「冰凍三尺」,如果今時今日我哋對呢啲校園亂象仍然泰然處之或者冷眼旁觀,將來承受惡果的,同樣係我同你。


原圖:rthk


請Follow我們的YouTube頻道:https://bit.ly/2kgU8qg

下載我們的手機應用程式,收看第一手精彩內容:https://www.speakout.hk/app

3
好好笑
16
令人傷心
2
點算呀

評論