盲反派反暴力雙重標準
盲反派反暴力雙重標準

自從香港激進示威者嘅暴力程度不斷升級以嚟,大家都見到一班盲反派政客又好、媒體又好,一直大大聲話唔譴責、唔割席,仲經常包庇同美化暴行。就好似公民黨前黨魁梁家傑早前喺港大一個公開論壇上面直頭講到「暴力有時或可解決問題」;又例如盲反派「法律專家」戴耀廷一時話「暴力唔一定係錯」、示威者破壞係「物理學上嘅暴力」,一時又卸責以誤信任警方嚟合理化「私了」歪風等等。但係當噚日民主黨立法會議員鄺俊宇、《生果報》女記者相繼被襲擊之後,成班盲反派嘅講法又即刻唔同嗮,齊齊跳出嚟譴責暴力,仲要警方嚴正調查。大家點睇?呢啲算唔算雙重標準呢?囍雨就覺得,佢哋玩弄雙重標準嘅手法真係稱得上「十分之高超」。


話說噚日朝早鄺俊宇喺天水圍畀幾個蒙面人圍毆兼拍埋片、仲話身體多處都有受傷;到咗夜晚,又有《生果報》女記者放工之後被人伏擊,要送院治理。兩宗案件依家都調查緊,大家對內情都所知唔多,不過囍雨睇到一班盲反派嘅事後反應就可圈可點。例如民主黨主席胡志偉就「強烈譴責」暴力事件、「不能接受」,鄺俊宇仲七情上面咁款話自己被襲擊係「國際笑話」;而《生果報》對於員工遇襲亦都即刻「強烈譴責兇徒暴行」、「促警方盡速將兇徒繩之於法」。睇完呢啲反應囍雨先發覺,咦!原來佢哋反暴力喎!


平民被打點解唔譴責?


但係當呢班人大講譴責暴力嘅時候,囍雨要問啦,當日前有平民被一班暴徒圍毆、打到頭破血流仲要打嘅時候,點解唔見啲盲反派政客出句聲譴責下暴力呢?當有人求饒想走都要被拖出的士打一餐嘅時候,點解又唔見有人挺身而出、履行保護市民嘅「議員天職」呢?係咪就因為政見唔同或者唔係「自己友」,就要「認命」、「打死冇怨」呢?係咪「自己友」打人就天經地義、頭上有光環呢?更甚者,大家唔好忘記,近幾個月嚟當暴徒不斷以升級嘅暴力破壞香港,縱火、襲警、掟汽油彈、燒地鐵出入口嘅時候,似乎從來都冇一個盲反派政客要求「嚴正執法」、「盡快將暴徒繩之以法」喎。咁大家真係好唔理解,究竟喺佢哋嘅概念裡面,點先叫「暴力」呢?


香港之亂 多得盲反派


囍雨就想講,呢班人所謂「反暴力」統統都係假,只有當「自己友」成為受害者嘅時候,佢哋先至會行出嚟譴責「呢一種暴力」、話呢啲係「白色恐怖」;至於其他警員、市民被打、被私了,對唔住!唔係自己友、「冇嘢要講」,分分鐘仲可能覺得政見唔同者抵打、抵死添!而對於果啲打爛香港、針對警察嘅暴力,大家唔好忘記真係要多得呢班盲反派唔少,到依家都唔割席、仲「同行」緊添。佢哋想香港好、和平?咪天真啦!呢班人本身就係暴力禍根!


原圖:文匯報


請Follow我們的YouTube頻道:https://bit.ly/2kgU8qg

下載我們的手機應用程式,收看第一手精彩內容:https://www.speakout.hk/app

43
嬲爆
3
唔係呀哇
2
驚訝

評論

  • josie1216@gmail.com
    josie1216@gmail.com
    3年前
    0 回應 檢舉
    ^^
    • josie1216@gmail.com
      josie1216@gmail.com
      3年前
      0 回應 檢舉
      Great

      沒有更多評論

      沒有更多評論