黎智英為何不「殉道」?
黎智英為何不「殉道」?

《逃犯條例》修訂風波發展到今日,已經變成一場比一場暴力嘅動亂;喺呢一陣子動亂當中,盲反派、《生果報》等意圖搞「政變」嘅人士或媒體,不但止唔同暴力割席,反而不斷「鼓勵」甚至煽動啲年輕人繼續「抗爭」;囍雨日前睇《生果報》,見到《生果報》老闆黎智英又親自撰文,今次仲話自己為年輕人嘅「殉道精神」哽咽,仲話呢啲係超越強大嘅精神運動。對於黎智英內心有幾為呢種「犧牲」精神感動,囍雨就唔清楚,但佢咁樣喺度宣揚呢種想法,其實即係想繼續推啲年輕人去做炮灰,甚至要佢哋「犧牲」!


「殉道精神」已在?


為免因為自行演繹黎智英寫咩而引起誤會,囍雨喺度原文照錄黎智英寫咩,先等各位自行思考:


「有一次我與十多個勇武派年輕人談話,其中有三位二十歲出頭的年輕人私下說,會不惜犧牲生命保護香港。我問他們年紀輕輕為甚麼有這種想法。他們都說,因為愛香港。我當時聽了哽咽,答不上話來,是否發生不重要,殉道精神已在。我心頭下沈,靈光一閃,這是個超越強大的精神運動。有年輕人為了愛護香港不怕犧牲性命,為這抗爭燃起了殉道的火焰。殉道者精神的道德力量,團結香港人意志,萬眾一心,也感動了世人的良知,予以我們強大的精神力量。」


首先,囍雨要指出黎智英同《生果報》以至其他盲反派政客一樣,基本上都係對暴徒暴力隻字不提,諸如暴徒襲警放火、掟汽油彈、襲擊平民等等,佢哋全部都當睇唔到,相反仲話佢哋和平添!咁大概係因為如果佢哋譴責暴徒、同暴力割席,咁樣反政府、反中央力量就會削弱,「運動」可能就無以為繼,所以佢哋一定會繼續「擁抱」暴徒,甚至將暴徒捧到「天咁高」。


至於黎智英呢篇文章,利用相當篇幅去講「殉道精神」,其實係想將反政府、反中央嘅行動推到極致;之前《生果報》訪問啲所謂「衝衝子」,就講到佢哋被捕、坐監都唔怕咁,而家黎智英就「更進一步」,話佢哋為咗抗爭,連「死都唔怕」,成為一種「強大嘅精神力量」。但囍雨要問一句,唔通為咗抗爭,黎智英覺得就算啲年輕人要「殉道」、「犧牲」,都係在所不惜?


你搞政變 青年埋單?


如果大家有留意黎智英近期嘅種種言論,都大概會知道佢根本唔係想爭取咩「五大訴求」或者單純反對《逃犯條例》修訂,而係要與中國為敵、為美國而戰,甚至如佢文章所寫要「改變香港、中國未來」;簡而言之,就係搞「政變」。既然搞「政變」,當然要有人「犧牲」,而要為呢場運動「犧牲」嘅,就係《生果報》不斷煽動嘅年輕人,如果大家仲以為黎智英等只係爭取民主,咁實在係睇得件事太簡單喇!同埋如果已經將抗爭提升到「殉道」嘅層次,大家又要問下黎智英,點解佢唔自己「殉道」先(佢自己講過預咗會「死」),佢啲仔女唔「殉道」先?,而係講年輕人準備「殉道」呢?


怕了《緊急法》


值得一提嘅係,黎智英喺佢文章當中煞有介事地提到《緊急法》甚至解放軍問題,仲估計中央唔會容許港府動用《緊急法》;點解黎智英要咁講?囍雨相信,因為如港府動用《緊急法》,唔單止暴徒可能唔再可以蒙面示威,連一直煽動暴徒嘅媒體、政客,諸如盲反派同《生果報》都難再生事,所以黎智英等估計港府唔會動用《緊急法》,咁可能係因為佢哋都驚,驚《緊急法》令佢哋再無煽亂空間。既然佢哋都有啲驚,咁可能代表《緊急法》更值得港府考慮動用。 


原圖:大公報

17
超無奈
3
無意見

評論

  • josie1216@gmail.com
    josie1216@gmail.com
    3年前
    0 回應 檢舉
    ^^

    沒有更多評論

    沒有更多評論