是最後通牒 還是最大威嚇?
是最後通牒 還是最大威嚇?

下星期開學,意味一直喺暑假期間抗爭嘅部分年輕人,包括大學生、中學生甚至升中生,都要重投校園,繼而可能令反政府陣營嘅「抗爭」力量稍稍削弱(相信佢哋發起罷工、罷課都係想維持「力量」);囍雨相信,盲反派自己亦深知呢一點,所以唔同界別嘅反政府人士就訂出所謂「8.31死線」,要求政府喺8月31日前落實五大訴求,而民陣亦想喺8.31發起遊行,終點更想設喺中聯辦。囍雨認為,所謂「8.31死線」,其實係想話如果政府唔答應反政府人士嘅要求,佢哋會繼續「玩大件事」,甚至將抗爭行為繼續升級;但囍雨必須指出,如果佢哋咁做,除咗損害香港利益,只會推更多年輕人「身陷險境」。


要求之後 必有激烈行動


睇番過去幾個月嘅「紀錄」,大家應該會明白到,每次盲反派政客、反修例人士提出訴求要求政府「幾時」回應,之後都極可能有大型衝突發生。好似民陣搞完6.9遊行後,6.12就發生咗近月第一次大型流血衝突,暴徒嘅磚頭、鐵枝橫飛,逼使警方要用武力回應;數近少少,民陣喺8.18搞咗個所謂「和理非」集會,之後啲政客稱「我哋已經好和平喇,係政府唔回應訴求」,隨後嘅週末,暴徒嘅暴力就全面升級,甚至狼到直接向警員掟汽油彈,好似想「謀殺」咁款。所以依家啲政客、反政府人士又玩設立「死線」呢招,囍雨估計8.31之後,甚至喺8.31當日,肯定有極度暴力嘅事件發生。


別再推年輕人出來!


喺呢度,囍雨要奉勸各位政客、反政府人士,繼續抗爭,甚至暴力抗爭落去,唔會為邊個「帶嚟勝利」,講得白啲,就係「大家都輸」;喺抗爭、衝突過程中,警察會受傷,示威者、暴徒都會受傷,仲有可能俾人拉。至於其他市民、商舖呢?都有可能無辜地捲入衝突,齊齊遭殃。只要睇返呢幾日嘅新聞,見到只有12歲嘅升中生穿上全副勇武裝備被捕,大家真係要諗下,係咪仲要推啲年輕人甚至少年出嚟做「炮灰」,而所為嘅就係「難過登天」嘅訴求?(例如叫政府不檢控涉嫌違法者,可能嗎?)


風波發展到今日,既已超出反修例嘅訴求,亦已經超出和平、理性、不違法治嘅底線;政客永遠都有政治目的、盤算,但如果所採用嘅手段係不斷推啲年輕人做「炮灰」,鼓吹使用暴力,不惜啲年輕人受傷、被捕,大家真係要問下啲政客,午夜夢迴,佢哋心中可有愧疚?為咗香港,為咗下一代嘅前程、安危,收手啦! 


原圖:RTHK
16
嬲爆
1
超無奈
0
無意見

評論