學生要罷課 又不計缺席?
學生要罷課 又不計缺席?

仲有唔夠兩個星期就開學,大專學界計劃由9月2日開始,發起所謂「罷課不罷學」行動,要求特區政府喺9月13日前回應佢哋嘅「五大訴求」,否則佢哋唔排除會無限期延長行動或者發起「三罷」行動。值得大家留意嘅,係一群學生代表似乎想罷課,但又唔想付出「代價」,據報呢啲學生代表想爭取「9月唔計出席率」或者「酌情處理」。其實呢,如果怕出席率問題影響到學業,咁又搞咩罷課呢?又或者如果要用行動表明「決心」,仲要怕咩出席率問題?仲有,如果罷課係叫埋中學生,咁咪即係要啲中學生都捲入政治行動?

 

9月不計出席率?

 

據報道,呢啲矢志要抗爭落去嘅學生代表,有人特別提到「醫療(學科)睇重出席率」、有必修課程要求八成出席率先可以考試,所以佢哋積極同校方溝通,包括爭取「整個9月唔計出席率」或者「酌情處理」。簡單而言,佢哋有部分人就係又想罷課,但又唔想承擔罷課為學業帶嚟嘅後果。

 

對於呢啲學生代表嘅「無痛罷課」想法,廣男係反對嘅。第一,返學、上課、交功課等等,呢啲係學生嘅基本責任,如果有個別學生選擇罷課,佢哋就應該為自己決定承擔責任,要學校因為「政治理由」而唔計佢哋缺席,實在於理不合;其次,有個別學生會選擇罷課,但可能有更多學生選擇繼續上課,咁如果罷課者可以唔計缺席,對其他學生、同學又係咪公平呢?

 

為何波及中學生

 

更重要嘅問題,係今次罷課行動唔單止係已經「成年」嘅大專生罷課咁簡單,而想發動一定數量嘅中學生參與;成年人自己做決定,再因此而負上責任,其他人就算唔同意都好,都未必管到。但如果係連中學生都要波及,廣男實在唔能夠同意,一嚟會影響學業、學習,二嚟如果啲中學生又跟埋上街,甚至作出激烈、暴力行為,後果會係點?最近就有中學生家長打電話上電台,表示擔心啲仔女學業、學習受影響,亦憂慮佢哋「不罷學」,所「學」嘅係咪反政府同暴力。

 

歌仔都有唱「學業要緊,我會小心」,大學生有政治訴求要表達,大家可以理解,但如果用上自己學業作為籌碼,用以要脅政府,廣男只能夠講句,咁做實在太愚蠢喇! 


原圖:文匯報

12
嬲爆
4
超無奈
0
無意見

評論