民主黨說好的紀律處分呢?
民主黨說好的紀律處分呢?

民主黨立法會議員許智峯公然於去年4月喺立法會強搶女政府人員手機,仲要攞人電話入廁所「窺視」一番,引起社會極大批評,民主黨領導層、許智峯本人都曾就事件公開、鞠躬道歉,民主黨更曾聲稱會於短期內對許智峯展開紀律聆訊,並凍結佢黨籍;事過境遷,當許智峯已經俾法庭判處罪成,民主黨都仲未紀律聆訊完同處分許智峯,據報反而已經將佢黨籍「解凍」。講真,民主黨擺明係放生許智峯,唔當許智峯犯罪係咩一回事!

 

民主黨 有古怪

 

睇到民主黨「解凍」許智峯黨籍,廣男覺得一啲都唔出奇,因為只要睇下件事嘅時間表,大概就會估到民主黨極可能會放生許智峯;回想當初,許智峯搶手機案被廣泛報道後,許智峯本人出嚟公開道歉,仲向公眾鞠躬,民主黨一眾管理層又一副「誠懇樣子」出嚟道歉,表明短期內會紀律聆訊許智峯;但事隔一排,就有報道話由於事件進入司法程序,所以唔會紀律聆訊許智峯住,果時已經有人估計,民主黨係想放生許智峯。

 

依家許智峯被定罪,民主黨對佢紀律聆訊似乎又未完同有結果,民主黨就決定解凍佢黨籍,呢個係咩玩法呢?如果先「解凍」許智峯黨籍,但之後聆訊許智峯違紀,咁民主黨咪好尷尬?廣男斷估民主黨唔會咁樣攞石頭砸自己對腳;所以之後就算裁定許智峯行為不當,民主黨極大可能都只會輕輕「帶過事件」,既唔會踢佢出黨,更唔會要求佢辭去立法會議員職務。廣男呢個估計準唔準,大家可以繼續觀察。

 

包庇暴力 成民主黨「日常」

 

講真,相對於近期發生嘅暴力衝突,許智峯搶手機單嘢,喺盲反派以至民主黨內,其實已經變成「小菜一碟」,唔同嘅盲反派政客包括民主黨議員經常企喺暴徒面前幫啲暴徒擋住警察,之前甚至有新聞圖片顯示民主黨立法會議員鄺俊宇喺暴力衝突現場同持有利器嘅暴徒「密斟」;如果以依家盲反派嘅標準,佢哋可以「包容」暴徒,當然都可以「包容」許智峯啦!廣男認為,如果民主黨仲想證明自己唔係「縱暴黨」,最好方法就係嚴懲許智峯!不過觀乎形勢以至民主黨嘅「小動作」,相信佢哋唔會咁做。 民主黨經常讉責政府官官相護,輪到佢哋黨員犯事,佢哋係咪講一套做一套呢?


原圖:RTHK

8
嬲爆
0
超無奈
0
無意見

評論