「和理非」變成激進行動的藉口
「和理非」變成激進行動的藉口

盲反派喺「反政府」行動當中,有時就好似經濟理論所講嘅「無形之手」一樣,如果行動反應冷淡,「無形之手」就要諗計炒熱佢;如果行動過「熱」,例如好似之前機場暴力事件連內地旅客及記者都毆打,盲反派班政客就要諗計為事件「降溫」、「消毒」。囍雨相信,佢哋噚日所謂嘅「和理非」集會或者遊行,就係要為暴力事件「降溫」,但囍雨要提提大家,千祈唔好俾班政客誤導到,因為暴力降溫,隨時又可以「升溫」,噚日大致和平,絕對唔代表佢哋之後行動都係和平!大家都要走着瞧!


「和理非」的民意戰

 

綜觀近日形勢,民陣搞個「和理非」集會,極度強調和平,甚至有新聞圖片見到「勇武派」人士話要與「和理非」同行一日,以多謝「和理非」做勇武派「後盾」,堅決支持佢哋咁話,延續「不割席,不篤灰」嘅「精神」。不過,囍雨要同大家講,呢個「和理非」集會,只係一個表象,往後幾近肯定仲會有暴力抗爭。

 

首先,盲反派突然大搞「和理非」,囍雨係覺得佢哋要「補鑊」,因為上星期佢哋喺機場禁錮、毆打甚至可以話係虐待內地旅客同記者(仲有襲警),可以話係負評如潮,好多支持開佢哋嘅市民,都忍唔住要批評佢哋;為咗幫暴徒「消毒」,挽回反政府陣營嘅「民氣」,有人組織去機場同旅客道歉,係一種方法,民陣搞「和理非」集會,亦係想話俾人聽,「其實我哋『可以』好和平」。

 

事實上,民陣以至盲反派咁做,係有「後著」嘅,當佢哋試圖將暴力事件「降溫」做「和理非」,其實係想表示佢哋已經和平地表達訴求,如果政府唔「回應」佢哋訴求呢,咁勇武派再搞暴力抗爭呢,咁政府等就唔可以再有理由怪責盲反派以至其他反政府人士喇;到時再打過,行動升級,佢哋一定會聲稱係「政府責任」!

 

認清他們的策略

 

經過連番暴力事件,盲反派知道要繼續搞落去,就首先要穩住「和理非」嘅支持,所以佢哋搞呢個集會,既為「自己人」嘅暴力降溫,亦為將來繼續「攻」政府提供理由;大家一定要睇清楚,主流盲反派政客,係一定會聲稱「和理非」嘅,往後有幾多暴力衝突,佢哋亦一定會繼續卸責俾政府。所以,面對一種「暫時」的和平,大家真係唔好咁放心,由噚日嘅新聞可見,班勇武派喺政總附近已經蠢蠢欲動,今次「唔郁」,絕對唔代表下次都「唔郁」。

 

仲有一點,就係民陣雖然聲稱噚日有「百幾萬」人行出嚟,但觀乎現場片段,民陣行動嘅參加人數似乎已經同六月果時難以相比,所謂「一鼓作氣,繼而衰 …」,民陣、盲反派以至其他反政府人士,啲「民氣」係咪可以持續落去,同樣值得深思。 

 

原圖:RTHK

4
超無奈
3
嬲爆
3
無意見

評論