出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
民陣要搞「和理非」遊行?
民陣要搞「和理非」遊行?

有關《逃犯條例》嘅風波持續升溫,但凡有集會、遊行,無論係有不反對通知書嘅,抑或係無不反對通知書嘅,基本上全部都演變成暴力衝突;喺呢個咁危險嘅氛圍,正常人都知道一有集會、遊行,就「必定」出事,但奇怪嘅係,民陣喺呢個時候仲想搞「和理非」遊行,仲話如果無不反對通知書搞遊行,佢哋仲有Plan B。囍雨實在好奇,喺呢個時候搞遊行,民陣係咪想複製6.12事件,用遊行人數加衝突令政府讓步呢?至於所謂Plan B,到底又係咩Plan呢?事實上,近期嘅暴力流血衝突,已經令到唔少人受傷、被捕,民陣喺呢個時候搞遊行,所謂「和理非」行動,極有可能變成「大暴動」!


遊行之後 會是甚麼?


講真,民陣搞遊行,一定話自己係「和理非」,一定呼籲人唔好用用武力,等於佢哋今次搞遊行,都強調「希望能讓激進派稍作休息,故發起當日再遊行,籲『和理非』們重新站出來,以人數向警方施壓」,但事實係點呢?不如等囍雨同大家回下帶,睇下民陣之前做過乜。


6月9日,民陣搞遊行,終點喺金鐘立法會對出,當遊行隊伍去到終點果時,唔知點解民陣叫人唔好散,話要預演佔領立法會,之後到傍晚時分,就無端端話會向有需要人士提供「法律支援」,結果當晚就發生暴力衝突;到咗6月12日,民陣喺立法會外一帶搞集會,結果係點?結果梗係「和理非」變「勇武抗爭」,有激進示威者掟磚、掟鐵枝、衝擊警方防線。再數近少少,民陣喺7月21日又搞遊行,明明遊行終點喺灣仔,但遊行完之後民陣呼籲市民散去果時,揚言金鐘、中環「過得去」、「注意安全」,之後港島區亦出現暴力衝突。以上事件,大家可以話民陣係「和理非」,但佢擺咗個台出嚟俾其他人之後去衝,亦係無可爭辯嘅事實,當民陣話8月18日要再搞遊行,囍雨只能夠講句,又玩「搭台」呢招?唔好喇掛!


民陣不能確保「和理


撇除民陣係咪有心「搭台」俾勇武派喺遊行、集會後「行動」呢個因素,囍雨必須指出,就算民陣本身唔想有暴力事件發生,佢哋係絕對無能力制止激進示威者「動武」,因為一班激進示威者,根本只係借民陣遊行個台去搞「後續」行動;所以,對於係咪批准民陣喺嚟緊周日遊行以至集會,或者點樣規範民陣,囍雨覺得警方真係要慎重考慮。


最後,囍雨要提出一個嚴肅問題,無論係民陣、個別人士以至其他團體,佢哋再搞遊行、集會,行動勢必「升級」變成暴力衝突,之前沙田有警員被咬斷手指,近日有女示威者被「射爆眼」,又有警員俾汽油彈引起嘅火燒傷,好明顯係越嚟越多人受傷,而且傷得「越嚟越重」;繼續「抗爭」,意味繼續有人受傷、被捕,出現更多流血事件,有必要咁做咩?民陣如果尚有一念之仁,就應該收收手,等社會回回氣。


原圖:RTHK


21
超無奈
4
點算呀
3
無意見

評論