反修例風波發展到今日，已經變成一波波暴力衝擊，而且示威者甚至暴徒更係不斷將暴力升級，由最初衝擊、掟嘢，變成周圍襲警、縱火；喺呢個時勢，其實只要稍有理性，都會知道反政府人士應該收手，唔好再用暴力手段，但盲反派以至佢哋嘅喉舌媒體，似乎唔想停，好似想局勢再亂啲然後「坐收漁人之利」咁。噚日，廣男見到《壹傳媒》老闆黎智英喺自己旗下嘅《生果報》寫咗篇文，明言「打着一場西方道德文明的仗」，仲話「戰爭」唔可以輸；言下之意，黎智英係咪想香港繼續「流血」？

美國有義務「支持」他們？

黎智英呢篇題為〈站在道德高地上的雞蛋〉，當然係繼續為動亂提供「道德理由」啦，佢喺篇文章尾段，特別提到佢哋（應該包括他自己及其他反政府人士）係打緊一場「西方道德文明」嘅仗，自己同美國人講過佢哋係打着「共同的仗」，所以美國或者美國人有義務支持佢哋，至少喺政治上同精神上作出支持，仲話「我們不能輸掉這場人心的戰爭」，自稱係「道德高地上的雞蛋」云云。睇到呢度，廣男首先想問一句，黎智英係咪想香港人繼續流血先？

對於黎智英話自己「打緊仗」，或者話唔能夠輸掉「人心的戰爭」，廣男第一個反對，就係黎智英以至《生果報》係咪覺得事情發展到呢個地步，反政府人士已經有幾百人被捕、發生無數流血事件，都要繼續抗爭落去先？如果係咁嘅話，好明顯即係要年輕人繼續做炮灰，做黎智英等人「彰顯西方文明」下嘅犧牲品！

雖然黎智英「一而再」聲稱自己係為「美國而戰」，廣男必須指出，其實美國總統特朗普早前先講過，發生喺香港嘅事係「暴動」，而且係屬於「中國嘅事務」；黎智英仲喺度重複強調「為美國」或者「為西方文明」而戰，係咪即係就算人哋總統話唔關佢哋事，黎智英都要人哋干預香港事務呢？到底係黎智英「自作多情」，定係美國真係喺背後為佢哋「撐腰」，真係撲朔迷離。

西方文明包括法治嗎？

最後，對於黎智英強調嘅「西方道德文明」，大家要問下黎智英，西方文明包括法治嗎？西方文明中嘅自由，包括傷害他人嘅自由嗎？如果一句「西方道德文明」傳媒、示威者或者暴徒就可以為所欲為，咁呢種「西方道德文明」，對唔住，廣男唔識欣賞，相信大部分香港市民亦唔會認同！

原圖：RTHK