免於恐懼的自由
免於恐懼的自由

反修例行動發展到今日,已經變成「無法無天」、肆意破壞嘅一波波違法暴力行為,廣男清楚記得,當初一班反對《逃犯條例》修訂嘅政客、人士,唔少都打住香港要有「免於恐懼的自由」嘅旗幟,稱香港人一定唔可以「送中」;但到依家,呢班人士甚至係暴徒嘅行為,正正就係令到香港各區、各階層、各年齡層嘅人感到恐懼,甚至安全都受到威脅,呢啲現象不禁令人憤怒,原來一班當初聲稱要令香港人「免於恐懼」嘅人,原來係為香港人帶來更多、更大嘅恐懼!


我不敢大聲說話


只要大家留意到近日嘅暴力衝突,唔難會發現一班暴徒已經將罪行「全面升級」,除咗已經變成例行公事嘅「掟磚」等暴行,依家啲暴徒甚至縱火燒車、想燒差館、掟汽油彈,唔少香港人都感覺「人人自危」;例如日前嘅所謂「三罷行動」,香港各區都出現暴力行為,唔少商舖提早「落閘」,當香港市民因為示威、暴力行為連行動、做生意嘅自由都失去,呢班示威者、暴徒係咪仲好意思同大家講,話幫大家爭取、維護緊「免於恐懼嘅自由」呢?!


廣男身邊有黃絲親友,亦有藍絲親友,近日當一啲藍絲親友同廣男講啲示威者、暴徒有幾過分嘅時候,廣男第一個反應就係,「你細聲啲,如果俾嘅黑衣人聽到,我同你都會俾人圍 …」;又例如,當廣男同家人經過示威「戰場」嘅時候,廣男都一定同身邊親友尤其係小朋友講,「一陣經過地鐵站,可能會見到啲示威者,唔好亂講嘢呀!」甚至喺地鐵車廂遇到黑衣示威者時,切忌舉高手機。當然,相比起示威區嘅商戶或者當區居民,廣男未至於好「恐懼」,但不時要諗附近環境係咪安全,叫身邊人唔好亂講嘢,廣男真係Feel唔到班示威者點樣幫市民爭取緊自由或者「免於恐懼嘅自由」。


自由包括不傷害他人


當盲反派政客或者個別人士「日以繼夜、夜以繼日」地高舉自由旗幟時,廣男真係要講,自由並唔係話你想做咩就做咩,而係你想做咩,前提係唔可以犯法、亦唔會傷害到其他人,以至唔會影響到社會秩序同安寧。大家可以試想,如果自由係「無邊無際」兼「恣意妄為」,咁班示威者、暴徒打人、放火、圍人、網上欺凌、起底等等乜都得,咁活喺呢個社會嘅人,就一定時刻生活於恐懼之中。呢個不幸嘅現象,正正就係依家香港嘅當前狀況,大家唔想繼續係咁,就應該出聲,向暴力、白色恐怖說不! 


原圖:中通社
11
嬲爆
3
超無奈
0
無意見

評論

  • Real HKer
    Real HKer
    4年前
    0 回應 檢舉
    警察在記者會一再公然講大話,真係離哂大譜。不過以下片段TVB同主流媒體一定剪走唔講唔播 //
    1. 明明係宿舍樓上掉炮仗落街,變左有人在宿舍外點炮仗
    https://www.facebook.com/watch/?v=447786672737351
    片中影到爆炸品明顯擊中雨傘頂部,由此可見非藍絲抹黑示威者所說在傘內點燃再引爆,而是警察宿舍內有人從高空投擲爆炸品
    上次催淚彈的確打中老人院,之後院內拍到片證據確鑿,警在記者會一再否認大話連篇。 Source:https://m.facebook

    沒有更多評論

    沒有更多評論