香港安全不再?
香港安全不再?

近日香港唔同地方發生暴力流血衝突,有老伯伯喺示威現場同示威者起口角,被示威者群起推倒;有女商人路過示威現場,因為被「懷疑」係女警,所以俾人箍頸、襲擊。發生呢一連串衝突,有人懷疑香港到底仲係咪安全城市;最近,就有研究機構嘅競爭力報告指出,香港喺幾項競爭都係第一,但係「最安全城市」方面,就由去年第一變成今年嘅十名不入。呢個算唔算係對香港嘅一大警號呢?


示威影響安全?


全球城市競爭力研究院同中外城市競爭力研究院主辦「2019第十八屆全球國家(城市)競爭力分類優勢排行榜」,香港喺「中國城市貿易競爭力排行榜」等分項都係榜首,但係有部分指數已經開始回落,例如「2019中國最安全城市排行榜」,香港就由第一變成頭十名不入,研究機構嘅一名高級研究員指出,近期修例風波示威浪潮影響咗香港排名,仲話過往五至十年雖然都有示威遊行,但都唔及今次規模,難以判斷往後示威會唔會減少。


對於香港係咪安全,或者已經無咁安全,廣男覺得整體而言,香港仲係一個世界級嘅安全城市,但係安全狀況,喺近日的確出現咗變化,尤其係示威遊行現場。


以近日三場遊行示威為例,喺早前嘅九龍大遊行,有老伯伯懷疑因為同示威者口角,一班示威者連老人家都唔放過,圍住佢將佢推落地,搞到要其他人將老伯伯扶番起,現場一帶又有另一名女商人被示威者襲擊;喺上周六反政府人士嘅上水遊行,除咗示威者、警察,連記者都被撞跌、拉跌而受傷(有人屈警察打傷記者,但之後該名記者澄清無俾警察打);到上周日嘅沙田遊行,連商場都變成戰場,喺商場食緊飯、行緊街嘅人,仲有啲要警察護送離開。如果呢啲情況持續發生,香港嘅安全狀況,真係幾難唔出問題。


也是法治問題


令廣男更擔心嘅係,一連串嘅示威或者暴力行為,除咗影響香港嘅安全、秩序同社會穩定之外,呢啲行為直接衝擊香港法治,係一個更令人憂慮嘅問題;示威一方可能認為,因為佢哋係打着「自由」旗幟地反政府,所以「做乜都得」、「做乜都啱」,犯法都不應被起訴咁,呢種思想,係依家對香港最危險嘅一個概念! 


原圖:文匯報

13
超無奈
4
驚訝
3
無意見

評論