修例風波發展到依家已經成個月，成個香港社會都傷得好重，其實大家都好唔開心。不過，如果話有咩人喺呢件事上面特別春風得意，廣男就覺得非壹傳媒老闆黎智英莫屬。見到佢呢排喺美國好似好威咁，華府幾個重量級官員，由國家安全顧問到國務卿、再到副總統，個個都排住隊接見佢。咁嘅排場，好多其他地方嘅政要都未必及得上，搞到廣男都真係有啲錯覺，好似黎智英先係香港代表咁款！不過講開又講，其實仲有冇人會認為黎智英只係一個「傳媒人」咁簡單呢？

黎智英到美述職？

講真，當廣男見到連美國國務卿、副總統咁嘅級數都出面嘅時候，真係覺得黎智英好似去咗匯報、述職咁款，不過「宗主國」就變咗係美國囉。尤其係黎智英仲要「懇請」對方盡量以「行動」支持香港人；「請求」美國政府發表言論，高調「支持」和「鼓勵」香港嘅年輕人云云，睇到咁嘅內容，大家可能又會有錯覺喇，唔講仲以為黎智英「管理」緊香港、而香港係屬於美國咁！黎智英咁落力，唔通係想喺美國撐腰之下、做香港版蔡英文？

有美撐腰 為所欲為？

嗱，如果黎智英有咁嘅諗法，大家千祈唔好笑佢，睇下咁多美國高官要員都咁畀面佢，就知道美國有幾「肯定」佢。所以就算黎智英旗下嘅《生果報》成日造埋啲假新聞，佢主子都冇人出過一句聲；例如近日《生果報》作古仔「屈」前港鐵主席馬時亨、富商呂志和咁，搞咗差唔多半個月，當事人唔發律師信《生果報》都唔肯跪低認錯，但好似完全無人理、無社會人士譴責佢同《壹傳媒》喎；又例如《生果報》日日煽動市民上街，甚至搞埋啲《完全抗爭手冊》去教啲人點應對警察、萬一被拉點算，好似教啲違法衝擊嘅人俾人拉點算咁，一樣無人理。當一個傳媒老闆，積極「參與」社會運動，全力企喺示威者一邊，仲要去美國「述職」，廣男真係想知佢同啲美國政客、官員背後係咩關係！

黎智英不斷擴大影響力，廣男推到極致啲，佢會唔會第時出嚟選特首嘅呢？以盲反派手上嘅選委票，要送黎智英入閘，可以話係完全無問題；退一步講，黎智英煞有介事、高調地去美國見美國官員，廣男覺得，佢喺美國嘅「支持」下，好可能已經密謀緊喺香港「再起風雲」（其實應該話係再搞亂香港先啱），大家繼續觀察，就睇下盲反派喺佢「指揮」下，會有咩新動向啦！

原圖：視頻截圖