立法會議員有權辱警?
立法會議員有權辱警?

警方7月7號晚喺旺角一帶展開清場行動時,立法會議員譚文豪、區諾軒突然現身,阻止警方做嘢。廣男喺傳媒片段見到,譚文豪當時一副理直氣壯咁樣同警方「交涉」,唔畀警方向前推進,擾攘咗5分鐘,態度極之驕橫;區諾軒更加帶埋大聲公,喺現場大呼小叫,當女警官要求佢哋離開時,區諾軒更加以英文「爆粗」侮辱女警官。廣男想講,呢兩位議員究竟想做咩呢?依家成件事係有人佔據緊馬路,而警方必須要執行職務、清場,要維持秩序,點解啲議員要阻住、仲要以粗口鬧人呢?係咪議員就有特權阻住警察清場、就有權辱警?真係大嗮咩!

 

根據傳媒報道,當時已經有一位男警官不斷呼籲譚文豪唔好阻擋警方推進,但係譚就企喺度唔郁,當警官要求譚返回行人路時,譚又選擇性「失聰」,仲指鬧對方「你諗掂你先好講啦」、「返去學堂再學過啦」,其後譚文豪「缩」咗一陣,當有專職傳媒聯絡嘅警員介入調停時,譚文豪又再次竟惡言相向,仲鬧對方「黐咗線呀!」;區諾軒就仲過分,對住呼籲佢哋離開嘅女警官大講「F」字頭英文粗口,又聲嘶力竭好似失控咁叫對方「Shut up!」。廣男真係覺得莫名其妙,兩位「尊貴」嘅議員,其實究竟有冇搞清楚警方喺度做緊咩呢?


立法者 不守法


廣男想講,警方清場,係為咗回復社會秩序,譚文豪嘅行為,可能已經構成阻差辦公。事實上,廣男今日見到,警察隊員佐級協會已經去信立法會主席梁君彥,斥責譚文豪及區諾軒刻意喺警方防線前挑釁,刁難警務人員,而且言行野蠻、粗鄙。廣男認為,譚、區二人,身為立法會議員,對執行緊職務嘅警員口出惡言、百般刁難,簡直有違身份,而佢哋作為立法嘅參與者,唔單止冇支持執法,仲要刻意妨礙警方工作,更加係對法治嘅極度唔尊重,如果佢哋真係涉及法律問題,警方理應依法追究。


若再爆衝突誰負責?


而區諾軒帶埋大聲公爆粗大鬧警官,問題就更加大。廣男先要問一句,就算身為立法會議員,係咪就有權辱警呢?更嚴重嘅係,譚文豪同區諾軒有冇諗過,以當時嘅情形,現場已經好混亂,當見到立法會議員都帶頭辱罵警察時,極有可能挑起在場示威者嘅對抗情緒,成為爆發衝突嘅導火索,如果再有一啲別有用心嘅人士趁亂搞事,可能會變成2016年旺暴嘅「翻版」,萬一真係出事,邊個負責呢?廣男唔知,喺譚文豪、區諾軒眼中,係咪只要人多、有示威嘅地方,都係「攞彩、抽水」嘅機會,但真係要奉勸一句,停手啦!唔好以為「立法會議員」幾個字就係大嗮,更加唔好以為自己有為所欲為嘅特權。


原圖:網絡


77
嬲爆
7
唔係呀哇
8
驚訝

評論