噚日有人發起「九龍區大遊行」，隨後一班示威者轉移陣地，試圖佔領廣東道、彌敦道等地方，更喺旺角一帶同警方對峙；就電視畫面所見，幾乎都係警方、示威者雙方「劍拔弩張」嘅畫面，但囍雨睇到一條喺網絡上廣泛流傳嘅片段，片段入面一個上咗年紀嘅伯伯懷疑因為同示威者口角繼而被包圍，甚至被毆打到瞓喺地，呢啲畫面幾乎都無被主流傳媒所報道，囍雨極度好奇，示威者要示威、表達意見，咁就代表佢哋可以行私刑，毆打唔同意見嘅人咩？

暴力事件 屢見不鮮

呢啲襲擊他人嘅暴力事件，近期可以話係屢見不鮮，例如日前有示威者去屯門公園示威後，一個被指拍攝其他示威者嘅年輕人，俾人逼佢攞手機出嚟俾其他人查閱不特止，仲有示威者圍毆佢一輪；同樣喺新界西地區，一個政黨嘅社區幹事做街站讉責暴力衝擊，就俾過百人包圍，又辱罵又威嚇，最後要令對方滅聲，混亂中仲搞到個幹事嘅義工受傷。依家啲示威者橫行霸道，囍雨真係要講句，太過分！

示威者變「執法者」？

之所以接二連三發生呢啲暴力事件，囍雨覺得問題嘅癥結所在，係因為班示威者覺得自己大晒，甚至可以訴諸暴力，毆打佢哋覺得「唔妥」或者意見不同者。有人同佢哋政見唔同，示威者向對方「郁手」，好似完全冇問題咁；同理，如果佢哋懷疑俾其他人影到佢哋「神秘」嘅容貌，如果對方唔交手機出嚟，恐怕「行唔到出街口」，當警察都無絕對權力查人手機嘅時候，一班示威者就好似「執法者」咁款，名符其實，無法無天！

一班激進示威者嘅野蠻暴力行為，除咗會令到其他人受傷害外，更加係嚴重衝擊法治精神；當一班示威者以「自由」之名破壞法治，其他人見到咁點？有政治訴求就唔需要守法，咁法律仲有咩作用？其實面對爭拗、爭議，就算雙方唔能夠慢慢傾，都起碼可以搵執法者或者用法律途徑解決，濫用私刑，係最失民心嘅方法。依家要勸止個別示威者唔好用暴力，恐怕難度非常高，但社會上其他人如果願意，其實應該發聲、制止違法暴行。 

原圖:網上圖片截圖