出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
不應捆縛學生「上戰車」
不應捆縛學生「上戰車」

盲反派日前發起反對《逃犯條例》遊行,之後隨即表示要發起罷市、罷工同罷課行動,當中嘅激進派人士,就喺網上發起所謂「包圍」立法會行動,有啲訊息仲喺度教人點樣武裝自己、點樣攻擊警察。果然,事件發展到今日,盲反派嘅所謂「三罷」行動,已經變成堵塞道路行為,仲有帶晒口罩嘅年輕人喺路面掘磚,會唔會用嚟襲警都未知。囍雨質疑,呢次所謂「三罷」集會,隨時演變成暴力衝突,到時場面一定失控,點解啲政客包括教育界人士,仲要煽動啲教師、學生出嚟呢?是誰灌輸這種危險想法給學生?


教師組織 帶頭「罷課」


傳統盲反派政客或者激進派人士,佢哋要借任何事件反政府或者挑起事端,佢哋嘅政治用意,大家都明白;但囍雨相當質疑,教協作為教師組織,葉建源作為教育界立法會議員,點解都要號召罷課呢?叫教師罷課,形同叫埋啲學生罷課「走出嚟」(葉建源稱「全港教師罷課是學校、老師和家長的總體民意表達」),但大家都估計到今日金鐘一帶隨時出現暴力衝突,教協、葉建源咁做,擺明就係將學生推上「戰場」,啲學生可能因為去集會、去衝,最後受傷、被捕,萬一真係發生咩事,教協、葉建源點向學生交代?點向佢哋嘅父母交代?


推學生 上前線


而家正值學校考試時期,教師應該謹守崗位,學生則應該努力應試,但政客就利用學生單純、血氣方剛,煽動佢哋走出嚟;喺囍雨執筆嘅時候,有傳媒就報道出有人正喺現場一帶掘緊磚,之後會唔會攞嚟襲警仲未知,但如果有起事上嚟,班學生又參與埋一份,除咗警察、涉事學生可能會受傷,最後被捕嘅學生仲可能會前程盡毁,教協、葉建源為反修例連學生都唔放過,根本就枉為人師,係最不負責任嘅政客。


值得一提嘅係,葉建源今日出席電台節目嘅時候,竟然攞五四事件嚟比較今次嘅暴力衝擊,但囍雨覺得佢根本就係比喻不倫,當年五四運動期間,學生罷課係因為中國被列強欺凌,但今次盲反派反修例嘅矛頭係直指自己國家,製造矛盾,兩事真係可以攞嚟比較咩?而當葉建源稱「希望年青人用和平方法處理,照顧自身安全」嘅時候,囍雨覺得佢更加係虛偽;如果行出嚟真係咁有「意義」,囍雨請教協一班人自己行出嚟帶頭示威,有事自己畀人拉,唔好推啲學生出嚟做「政治爛頭卒」,唔該!


原圖:RTHK


8
支持
2
好正
1
無意見

評論