出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
黃台仰不是政治犯!
黃台仰不是政治犯!

旺角暴動案疑犯黃台仰、李東昇獲德國批出難民庇護,引起各界然;黃台仰喺接受外媒訪問嘅時候,仲要話特區政府對佢嘅檢控具有政治動機,有報道稱事件顯示德國都認為特區政府正利用司法迫害港人。簡單而言,黃台仰就係想講自己係政治犯、受到迫害。但老實講,黃台仰因為涉嫌觸犯嚴重嘅刑事罪行而潛逃,囍雨覺得佢同難民或者政治犯完全沾不上邊!

 

黃台仰涉暴動罪

 

德國對黃台仰、李東昇批出難民庇護,確實令香港各界都非常震驚,原來政客喺香港犯下刑事罪行,係可以去外國申請難民庇護嘅!囍雨上網睇番「難民」嘅定義,《難民地位公約》寫明「難民」係「具有正當理由而畏懼會因為種族、宗教、國籍、特定社會團體的成員身或政治見解的原因,受到迫害,因而居留在其本國之外」,即係話真嘅「難民」,正常唔會係因為犯咗刑事罪行而潛逃在外,黃台仰講到自己被檢控有政治動機咁款,根本就係誤導人!

 

事實上,喺旺角暴動一案中,黃台仰幾乎被視為係案件嘅「主犯」,另一暴動案罪犯梁天琦,喺庭上作供嘅時候,亦表明過係黃台仰「叫人衝」,如果今日黃台仰可以成為難民、政治犯,咁他日其他政客喺香港犯咗事,一樣可以潛逃,然後話自己係難民、政治犯再尋求庇護。今次事件嘅最壞結果,就係涉嫌犯法嘅人唔能夠受到審訊或者法律制裁,法律唔能夠還暴動案受害人一個公道,法治亦唔能夠得到彰顯。

 

法治指港排16

 

另一個問題,就係個別媒體以至盲反派政客,講到香港嘅司法制度不被信任咁款,但囍雨想講,今日先有報道,話世界正義工程(World Justice Project)早前公布法治指數,香港喺全球126個國家或司法管轄區當中排第16位(民主大國美國都只係排第20位);如果香港司法不被信任,香港嘅法治指數會有咁高排名?班盲反派政客為咗反對《逃犯條例》,連香港司法制度、法庭同法官都想抹黑埋?過份啲掛!

 

最後,囍雨要喺度溫馨提示大家,黃台仰喺旺角暴動案後,曾揚言自己「寧為玉碎,不作瓦全」,原來佢口中嘅「寧為玉碎」,就係煽動完其他人「去衝」,其他人都被坐監,自己就去外國尋求庇護、逍遙法外;唔知道其他畀黃台仰「老點」甚至已經坐緊監嘅人,知道黃台仰喺外國逍遙快活緊有咩感覺呢?

 

原圖: 文匯報

2
支持
0
好正
2
無意見

評論