辱罵兼咒官員死 民主黨變「爛仔黨」
辱罵兼咒官員死 民主黨變「爛仔黨」

所謂「沒有最衰,只有更衰」,當大家以為民主黨始終係溫和派,「激極都有個譜」嘅時候,身為民主黨主席嘅立法會議員胡志偉,竟然衝出嚟做最激、最無禮貌果個,喺議事廳辱罵特首林鄭月娥,大叫「你唔死都無用呀八婆」,引來各方猛烈批評,事後胡志偉無道歉不特止,仲要話自己做法係「恰如其分」。囍雨就覺得,如果咁樣辱罵、人身攻擊甚至咒官員死都叫「恰如其分」,咁民主黨好明顯已經面目全非,變咗名符其實嘅「爛仔黨」!


胡志偉無禮 有失議員身份


話說噚日林鄭月娥到立法會出席特首答問大會,平時「斯斯文文」嘅胡志偉,發言果時就突然好「慷慨激昂」咁鬧林鄭月娥,甚麼「有黨性、有奴性、無血性和無人性」,質疑林鄭月娥無保障「一國兩制」等等,除咗粗口幾乎咩都講得出,之後林鄭月娥話胡志偉言論令人痛心,胡志偉就叫林鄭月娥「唔好講大話」,畀立法會主席梁君彥驅逐出會議廳,胡志偉終於就爆咗句,「你唔死都無用呀八婆」,令全場嘩然。


囍雨認為,胡志偉呢次突然「上身」、化身激進派、「爛仔政客」事件,應該要用宏觀嘅角度睇;大家諗下,民主黨近年醜聞不絕,最近嘅有立法會議員涂謹申等人喺立法會「扮開會」、「扮委員會主席」一事,遠少少嘅有立法會議員許智峯公然喺立法會強搶女EO手機、林子健「報假案」老屈內地人員以至林卓廷只顧政治炒作、耍手段而畀前黨友鬧佢「人格卑劣,毫無政治道德」等等,加埋今次胡志偉「咒官員死」事件,反映啲咩?反映民主黨已經唔係昔日「和平、理性、非暴力」嘅溫和政黨,已變成激進甚至暴力嘅「爛仔黨」!


民主黨將失去溫和支持者?


大家都唔知道民主黨點解要變成咁,更唔知佢哋一連串行動(包括犯法行為,例如林子健「報假案」、李永達「佔中」案)背後係咪有咩不可告人嘅目的,但囍雨有一點可以肯定嘅,就係民主黨喺盲反派入面嘅定位,素來都係吸納立場較溫和嘅支持者,而家佢哋變到咁激,甚至不惜犯法,咁佢哋係咪想趕走啲支持者呢?囍雨記得,民主黨顛峰時期,有成十幾個立法會議員,喺立法會幾有影響力,而家立法會議員越嚟越少,立場就越嚟越「偏激」,大家話佢哋係咪為自己「倒數」緊呢? 


原圖: RTHK
5
支持
5
好正
1
無意見

評論